Musza sie Wom prziznać, że jo je majdyka! Wiela żech za bajtla bez to wyciyrpiała, chocioż niy wiym do dzisio skuli czego, bo przeca nas ni ma zaś tak mało, bo aż dwoch na dziesiyńć ludzi robi wszystek lewom rynkom. Yno że ci, co yny prawom rynkom wszystek robiom, se tego ani niy poradzom przedstawić!
Dycki sie na nos mańkuty, lewajtki, lewajtkorze, mantyki abo majdyki godało, jakby my co gorszego byli, bezto my tego ni momy radzi!
Chocioż starka Elza fest mi przoła, dycki mie upominała, cobych wszystkigo do tej majdyki niy brała, bo sie ludzie sy mie śmioć bydom.
– Dziołcho, co ty we żywocie bydziesz robić! – lamynciła. – Sztrykować sie niy nauczysz, szyć a sztopować bydzie ci ciynżko, to cie chop zaroz ze chałpy wyżynie, boroczko! No chyba że jakom artystkom łostaniesz abo sie bogato wydosz, to bydziesz miała ludzi do roboty...
We szkole na mie krziwo sie dziwali a dycki przekłodali mi ołowek do prawej rynki. W doma mamulka mi wionzała lewo rynka bez cołki miesionc do stołka i tak żech sie nauczyła pisać prawom, ale rynka miałach słabo i musiałach se pomogać drugom. Jak żodyn niy widzioł, pisałach po starymu, ale rechtorka sie kapła a dostałach pała! Jednako te pisani obiyma rynkami mi sie przidało, jak żech była starszo. Dycki nastykłach za kożdym rechtorym, choćby niy wiym jak gibko dyktowoł.
We naszyj familiji było tych majdykow dość trocha: choćby tatulkow łojciec – starzik Paul a jego mamulka. Ze starzikowych dziecek, co ich cołkiym siedym było, aże trzi pisali lewom rynkom, a ciotka poradziła łoboma. Starzik Paul mioł trzinoście wnukow, a aż dziewiyńć było majdykow! A wszystkie te niywydarzone dziecka gryfnie malujom i to je ta tajymnica naszej familiji, co mało gdo ło ni wiy!
Sztrykować żech sie rychtik niy nauczyła, autym niy jeżdża, bo żech ni miała taki potrzeby, bezto niy wiym, jakby mi szło, szyja na elektrycznej maszynie, ale „pyndala łod gazu” musza mieć pod lewom nogom, a przi komputerze mom mysz do praworyncznych i jakoś dowom se rady, bo my, majdyki, o wiela wyncy poradzymy zrobić prawom rynkom niż ci drudzy lewom. Jednako świat ło nos pamiynto, bo trzinostego siyrpnia mieli my swoji świynto!
Komentarze