Kiejś to było tak, że Ślonzoki mało rajzowali, nojwyżyj do przocieli do Rajchu, ale terozki radzi jeżdżom po caluśkim świecie. Wszyndy idzie nasza ślonsko godka usłyszeć!
Roz, we Czechach, poszłach ze mojim ślubnym na torg kupić winogrona, a tu łoroz słyszymy straszne larmo! Myślach, że to som te Italijoki, co my ich po drodze minyli, ale to dwa nasze chopeczki tak fest klyni, że tyn slonski jynzyk był cołkiym podany na łacina!
Jeszcze gorzi było, jak my pojechali do ciepłych wodow aż ku wyngerski granicy. Na drugi dziyń przijechała wycieczka ze Katowic, a do końca turnusu już niy było spokoju! Nojgorszy był jedyn chop, bo sztyjc fafloł, co mu ślina na jynzyk prziniosła! Jak mie uwidzioł, to ryknoł na cołki basyn:
– Jo se myśloł, że Madziarki som czorne, a ta je ryszawo!
We piyrszej kwili chciałach mu co pedzieć na rozum, ale udałach, że niy rozumia, a miałach łod niego pokoj. Drugi dziyń padoł głośno ło jednej babie, że je cołkiym plaskato a piersi mo tela, wiela kot nacharkoł! Prawie kożdy dziyń była ło cosikej wojna, bo tam kupa Polokow sie wczasowało, a niy kożdy taki soroństwo doł se spodobać!
Selwik Gałuszka, mój kamrat ze roboty, padoł, że łon pojedzie na wywczasy na wyspa Bali do Indonezje, a je isty, że tam Polokow a tymbardzi Ślonzokow, niy spotko. Jednako jeszcze we fligrze skamracił sie ze jednym chopym, co tyż był ze naszych stron. Zakwatyrowali ich we piyknej chałpce, co stoła na plaży, bezto nikaj dali sie niy wypuszczali. Za jakiś czos tymu Selwikowymu kamratowi kompani a łopolani sie zmierzło i zaczon robić roztomańte szpasy. Po naszymu naubliżoł Japończykom, ale oni sie yno śmioli, bo go niy rozumieli. Jedyn roz ujrzoł we wodzie fest starego chopa ze dwoma modymi frelami, co im „gdoś cycyhaltry ukrodł”.
– Selwik! – wrzasknoł na cołki głos. – Patrz, ta ze prawej to mo gryfne citronki, ale ta drugo to mo taki, jakby sie i do mangla wkrynciły...
– Ty chamie ze Ślonska! – rykła dziołcha a chyciła chopa za kudły!
Gdo wiy, jak by sie to skończyło, jakby na pomoc niy prziszoł polski przewodnik, a Selwik tyż mioł dość dowcipnego kamrata, bo jak przijechoł nazod, zaroz zmiynił numer telefonu.
Komentarze