Lunatyki

Kożdy isto ło takich ludziach słyszoł, ale małokery we te godki wierzi. Jo se tyż za bajtla myślała, że to se yno tak starsi godajom, coby dziecka postraszyć.
Mamulka mi roz kejś rozprowiała, jak taki jedyn młodziok na spaniu łaził po dachu na starym, żorskim szpitalu. Ludzie mieli nakozane łod doktora, coby go niy wołać, bo jakby sie łobudził, to by mogł spadnońć a sie zabić. Jak yno sie miesionczek stracił za chmurami, to łon prziszoł nazod na sala, a rano nic niy pamiyntoł, co we nocy robił.
Moja kamratka Tilka, dycki rada cosikej nasmyślała. Roz nom padała we wielgi tajymnicy, że jejich somsiod lunatykuje kożdo noc. Wychodzi ze chałpy kole dwanostej a idzie prosto do drugij chałpy, kaj miyszko sama modo somsiadka, klupie na dźwiyrze, łone sie łotwiyrajom, łon lezie do pojstrzodka, a dżwiyrze sie za nim zawiyrajom! Siedzi tam ze dwie-trzi godziny, potym lunatykuje nazod ku swoji chałpie, a jak sie go gdo spyto kaj łaził we nocy, to łon dycki godo, że nic ło tym niy wiy!
Nasi kamraci Józik a Hyniek koniecznie to chcieli widzieć na swoji łoczy, a skowali sie poźno wieczor za somsiadowom chałpom we świyntojonkach. Było fest cima, bezto liczyli, że żodyn ich niy dojrzy. Mieli szczyńści, bo chop wylozł ze chałpy, jak jeszcze niy było dziesiyńć. Łoblykł se jasno piżama, to go było ze daleka widać. Łaził sztajfny jak robot, a rynce mioł wyciongniynte do przodku, jakby jako gimnastyka chcioł robić. Pokryncił sie trocha po zegrodce a potym zamiast do somsiadki poszoł do stodoły, no to synki za nim! A jak łoni yno wleźli za wrota, to chop ich chycił! Ale wrzasku narobili, bo ło życi błagali jedyn bez drugigo!
– Ale niy ryczcie, bo jo wom nic niy zrobia! – padoł somsiod. – Rod bych jednako wiedzioł, czamu za mnom łazicie!
– Bo my, bo my chcieli widzieć lunatyka! – wypolił Hyniek, bo Józik tak dzwonił zymbami, że słowa ni mogł wypedzieć.
– Mocie szczyńści najduchy, bo tyż żech se tak myśloł, jak żech was widzioł we mojich świyntojonkach! Jednako som sfas gupieloki, lunatyki dzisio niy chodzom, bo miesionczka ni ma na niebie! – a we wszystkim synkow objaśnił.
Jo żech sie łod nich tyż ło tym dowiedziała, ale eli to je prowda?