Piyrwej modzi tyż mieli radzi szpasy a beleco wywiodli, styknie se yno przipomnieć spady łod mojigo tatulka! Jeszcze za kawalera robił łon we jednej rybnicki hurtowni a dycki ze trzyma kamratami jeździł do dom cugiym ło szostej we wieczor, co lecioł na Pszczyna. Na tyj trasie puszczali yno taki wagony, co im potym „teksasioki” godali. Jedyn roz przisiadły sie ku nim dwie frelki. Godały, że sie same bojom siedzieć we pustych przedziałach, bo ich roz jakiś chop pogonił! Synczyska zaczli ich robić za błozna, łopowiadać niystworzone rzeczy a dziwali sie, eli dziołchy sie na to chytnom. Frelki niy chciały im łostać dłużne i ta bardzi pyskato spytała sie talulkowego kamrata, co mu Marcjan było na miano, po co wozi taki emaliowany, dwulitrowy zbonek. Synek zbonek otwarł a pokozoł i, że tam mo mlyko. Marcjan robił przi monce, a coby pylice niy dostoł, dowali mu w robocie kożdy dziyń liter mlyka. Łon mlyka ni mioł rod, a wyloć do ausgusa było szkoda, bezto woził go do dom, ale tego głośno niy padoł.
– Co to u was we Żorach mlyka ni ma, że ze Rybnika wozisz?! – śmioła sie dziołcha.
– Ja, mlyko u nos je, aż nawet za tela, ale to je ekstra mlyko, co go za żodne skarby niy kupisz, to je mlyko łod utopcule! Kamrat, co chowie utopce na mode, kożdy dziyn jom podoji przed robotom a mie zbonek mlyka prziniesie, bo jo znodł na stawach taki trzi małe, wizgerne gizdy, co mamulki niy miały. Same by kapły ze głodu, bezto wzionech ich do dom a trzimia we skrzince wele pieca. A żyrne to ciurstwo, krom utopcowego mlyka rade suchy chlyb frygajom!
– Cyganisz nos, co? – spytała sie ze niydowiyrzanim dziołcha, ale kamraci siarczyście prziświodczyli, że mode utopce widzieli, że som łogromnie gryfne, cołki zielone, yny na łepkach majom czerwione czopeczki, bo śnimi sie rodzom.
Synki isto by zdonżyli zapomnieć ło swoim błoznowaniu, ale za jakiś dwa tydnie spotkali ta frelka, co snimi do Żorow jechała, ale wiela niy godała. Łona prziniosła Marcjanowi wielki miyszek ususzonego chleba do utopcow!
Synek uznoł, że dziołcha mo dobre serce i zaczon śniom zolytować, a za rok sie pożynili!
I tak skuli utopkow tatulek stracił kamrata łod rajzy!
Komentarze