Moja kamratka Ilona, co uczy we szkole podstawowej, dycki godo, że choć je tako staro, coby mogła być starkom łod swojich uczniow, to czasym musi im zastompić mamulka!
– Przedstow se, że jo mom we piontej klasie dwanoście dziołchow a yno szejść synkow. Synczyska fest zgłobiajom, ale ze dziołszyskami je wiynkszo utropa! Nojgorzi je po WF-ie, te bardzi rozwiniynte pokupowały se biustonosze, a tym małym, chudym sie przekwolajom a działajom na nerwy. We szczwortek, zaroz po gimnastyce, mieli sy mnom polski. Zawołałach do tabule Aśka, nojmyjszo dziołszka we klasie. We piyrszej kwili żech sie wylynkała, że sie i co stało, bo na plecach miała mały pukel, ale jak żech pojrzała na te dwie niyrówne gorki ze przodku, byłach w doma!
Pytałach jom potym, coby łostała na pauzie.
– Co ci sie stało? – pytom sie, a łona sie yno rozbeczała a niy chciała nic godać! Bezto poradziłach dziołszce, coby pogodała ło tym ze swojom mamulkom.
– Nie mogę, proszę pani, bo mama jest w delegacji...
Potym zaczła godać, że je w doma ze starkom łod mamulki, a łona na babski tymaty ze smarkulami niy godo, yno zaroz żynie Aśka do nauki!
– I widzisz dziołcho – padała mi kamratka – jo, staro baba, musiałach zastompić mamulka łod szkolorki! Ale gibko sie wszystek wyjaśniło. Asia wiedziała, że dziołchy ze klasy zaś sie bydom śni śmioć na WF-ie, bezto chciała im udowodnić, że ni ma łod nich gorszo! Wyciongła ze szranku jakiś stary mamulczyny biustonosz, ale był na nia zawielki, bezto go zawionzała na wynzeł na plecach. Po cichu liczyła na to, że niy bydzie tego widać!
Jak sie Ilona zaczła dalij dopytować, dziołcha spuściła gowa a prziznała sie, że ze przodku nacisła niywypranych fuzekli, no i teroz jak sie zgrzoła, to łone tak fest śmierdzom, że ani dezodorant niy pomogo! Za doradom Aśka poszła do łaziynki a wciepła całe te „chomonto” do nylonowego bojtla, co i go rechtorka dała, a potym wsadziła wszystek po cichu do tasze. We wieczor pogodała bez telefon ze mamulkom, a za trzi dni łobie poszły do sklepu ze bieliznom.
– A skond to wiysz? – pytałach sie Ilony, jak my sie spotkały za pora dni.
– Mom swoja tajno broń – telefon kontaktowy do łojcow!
Komentarze