Jedyn roz, tak pod koniec wielgich feryji nasi modzi prziniyśli do dom gazeta, coch i downo niy widziała, bo teroz insze kupuja, bezto łod ciekawości ciepłach na nia łokiym. Niy było w ni nic nadzwyczojnego i już żech miała jom poskłodać, a tu łoroz widza, że piszom ło jakimś konkursie ło unijnych funduszach!
– To przeca ni ma do mie – padałach se – bo jo wiym ło tym yno tela, coch kaj słyszała, ale mogłabych co poszukać na internecie, przeca wieczor mom frajny?!
Ale jak żech yno ujrzała, wiela tego je, zaroz dałach se pokoj, bo do rana bych tego niy smogła!
Jednako mi po gowie tyn tymat coluśki czos chodził: eli jo mom ze tego jaki pożytek, że sam je Wielgo Europa? Wyszło na to, że niy bardzo, bo jo żodnej firmy zakłodać niy myśla, ni mom tyż pola, coby mi do niego dopłacili, a nasze dziecka już downo szkoły pokończyli.
I dalij bych se tak myślała, jakby na moji urodziny niy przijechali przociele, coch sie śnimi do tej pory widziała roz za „ruski rok”, bo chocioż niy miyszkali daleko, to dojazd do jejich miejscowości był łogromnie ciynżki i na raty: nojprzod busym, potym autobusym, a na koniec kawał jeszcze piechty, bezto mój chop tam niyrod jeździł! A teroz usłyszałach łod ujka, że zajechoł do Żorow za trzićwierci godziny, bo jechoł tom nowom autostradom!
Potym my se przi kołoczu a tyju siedli a łod serca po naszymu pogodali. Wyszło na to, że skuli tych autostradow, co ich tela nastawiali we cołki Europie, momy teroz wszyndy bliżyj, a ze przocielami (i ze tymi, co miyszkajom za granicom!) mogymy sie spotkać, kej yno bydymy chcieć!
Tymat do pisanio żech już miała i jak yno goście pojechali do dom, siadłach do komputera. Wszystek piykniech łopisała po naszymu i dołożyłach drugo kartka, kaj żech te swoji rozprowiani przełożyła na polski do tych, co ślonski godki niy znajom!
Dzisio żech sie dowiedziała, że sie we gazecie moi pisani spodobało a dostałach trzecio nagroda. Łogromnie sie śni raduja!
Roztomili, wom tyż radza: niy bojcie sie roztomańtych konkursow, bo łone tyż som do ludzi takich jak my! Styknie sie yno opowożyć, a potym już wszystek samo poleci. Powodzynio!
Komentarze