Jo tyż rada chodza po sklepach, jak mom ibryczne piniondze, ale to sie małokedy zdorzo! Jo mom nojczyńści tak, że lista je dugo, a piniyndzy knap abo i zdziebko zamało, bezto potym chodza po sklepie a kombinuja. Jak kupia tańszy proszek do pranio, to mi styknie na mydło, pasta do zymbow i kryma na rynce, ale niyskorzi niyroz siaronia, jak prani sie mi dobrze niy wypiere i trza go po drugi wsadzać do pralki, zamiast co uszporować, mom same straty!
We wielgich sklepach idzie czasym kupić co dobrego a tańszego, ale trza wiedzieć, co we kerym! Na taki wiynksze kupowani musza mieć cołki popołednie, bo jeżdżymy ze chopym łod jednego marketu do drugigo, a tam je tela towaru, że czasym jeszcze co przepomna, chocioż na liście tyn towor stoł.
Som tyż taki rzeczy, co niyrada kupuja, do przikładu strzewiki! Jak yno pamiyntom, tak było dycki, ale to były insze czasy a wszystkigo brakowało, ale teroz tyż we sklepach momy same „kozi ratki”, jak to moja starka godała. Yno jak keroś baba mo noga maluśko a wonsko, to do nich wlezie! Insze zaś som łogromnie twarde a uciskajom we palcach! Czasym trefiom sie tyż strzewiki do ludzi, ale zaroz tela kosztujom, że sie ich łodechciywo!
Jak niy musza, to nic niy kupuja we niydziela, bo te baby, co robiom we tych marketach, tyż by chciały mieć ta niydziela frajno, a w doma ze familijom posiedzieć! Jak tak godom, to moja kamratka Cilka dycki sie klupie we gowa a pado tak:
– Aleś ty je gupio dziołcho, moja somsiadka je rada, jak i we niydziela robota trefi, bo wiyncy zarobi! A nawet nasze dziecka tyż we niydziela po kościele wiynksze zakupy robiom! Majom to po drodze, bo teroz wele kożdego kościoła jakiś market stoji. A po drugi, kiej majom kupować jak bez cołki tydziyń som w doma kole szostej-siodmej we wieczor! Jeszcze ku tymu auto je do dyspozycyji i we rynkach, a na puklu wszystkigo smykać niy potrza! Jakby sie wiyncy znodło takich, co myślom jako ty, toby możnej te markety na niydziela zawarli, a wetna sie stobom, że dzisio toby cie za to niyjedni gymbom zatrzaskali a pognali!
Troszka prowdy we tym, co Cilka godo, je, bo mondrzi ludzie wymyśleli Dziyń bez Zakupow, ale eli to co zmiyni?
Komentarze