Francik Łodrobka jechoł do cery do Niymiec i już miesionc do przodku kupił se bilet na autobus. Maryjka już roz we tym Rajchu była, jak sie młodym narodziła Moniczka, ale Francik widzioł wnuczka yno na fotografiji, bezto teroz była jego raja. Godni Świynta były na karku bezto baba napiykła kołocza a pierników na miodzie a społu ze trzilitrowym baniokiym moczki wcisła to wszystek do starego koferka ze prawej skory. Francik trocha wyrczoł, że tela bydzie musioł nosić, ale w duchu był rod, że dziecka se pomaszkiecom, bo tam we tych Niymcach na wilijo jedzom gynsina a za nic majom post!
Francik jechoł autokarym ze klimom, ale i tak droga zdała sie łogromnie długo. We Zgorzelcu musieli czekać aż trzi godziny na swoja raja do celnej kontrole. Za tyn czos Francik pora razy sprawdził, eli mo paszport a marki do płacynio i troszka sie już zaczon nerwować, że jak tak dali podzie, to na ta wilijo może niy dojechać, a wiedzioł, że bez niego młodzi do wieczerze niy siednom!
Noreście do autobusa wsiedli polski wojok a dwa celniki: polski a nimiecki. Podziwali sie po wszystkich, a tyn polski celnik padoł tak:
– Żeby skrocić kontrola, łobejrzymy yno jedyn bagaż! Nojlepi łod tego nerwowego chopa! – a pokozoł na Francika.
Tego sie Łodrobka niy spodziywoł! Kwila trwało niż mu tyn kofer wyjyni, bo siadoł za piyrszego a jechoł do końca trasy. Do łachow yny pojrzeli, kołoczom tyż dali pokoj, ale baniok ze moczkom fest ich zainteresowoł! Nawet nasz celnik nigdy moczki niy widzioł, bo u nich sie kutia na wilijo warziło, ale tyn wojok to był ślonski chop i moczka znoł a celnika przeświodczył. Troszka baniokiym poszpluchtali a dali go nazod, ale ze Niymcym było gorzi:
– Was ist das?! – ryknoł.
– Zupa! – łodpedzioł wojok.
– Kompot! – poprawił polski celnik, bo tyż chcioł pomoc.
– Ja, Kompot! Narkotik, hasz, heroina! – wrzasknoł Niymiec a kiwnoł na kamratow. Łoni chycili Francika pod perze a społu ze tym ciynżkim kofrym zawlykli na posterunek. Za tyn czos autobus pojechoł dali. Bez noc Francik był na przesłuchaniu, ale rano sie wszystek wyjaśniło. Potym fest go przeproszali a łodwiyźli na drugi koniec Niymcow służbowym autym: prosto na wilijo!
Komentarze