Teroz na koniec roku przichodzi mi do gowy tako smutno refleksyjo, że łod mojich modych lot sie czasy łogromnie zmiyniły, bo piyrwej ludzie dowali se za przikłod richtik dobrych ludzi, co wiela do inszych robili, a za piniondzym sie niy łoglondali. We gazetach a we ksionżkach ło takich ludziach pisali, a teroz to takich łopisow ani we prasie, ani we ksionżce niy uświodczysz! Już pryndzy sie dowiysz, co kery nabrojił, kto komu prziwalił, jak niy piyńściom, to złym słowym, gdo kogo rod by sie pozbył, bo mu widok psuje, abo kery kerego za nic zabił! Nikedy, jak do tych gazetow pojrza, to aż mi sie włosy na gowie jyżom a strach mie łoblatuje, jako to te nasze dziecka a wnuki we takim świecie żyć bydom?!
Dobry człowiek, co drugimu pomoże jak tym istny je we potrzebie, to je gupek! Takigo to yny wycyckać do dna, a potym mu kopnońć w ta najszlachetniyjszo czyńść ciała, bo na wiyncy niy zasłużył, jak je taki naiwniok a we dobro wierzi! Samach tego niy wymyślała, ynoch łod ludzi słyszała we cugu abo we autobusie, jak żech jeździła na kursy sie doszkolać.
Niych tam godajom, co chcom, jo jednako mom porzad ludzi rada a wiym, że som dobrzi, yno sie ze roztomańtych powodow maskujom, głownie skuli tego, coby sie śnich insi niy śmioli!
Jak na mie kery powiy, że jo je dobro baba, jo dycki mom stego uciecha! Pora lot nazod przijechali do Żorow na mecz mode bejzbolisty. Synki byli aże znad morza. Po drodze we cugu znodli maluśkigo kotka. Żodyn się ku niymu niy prziznoł, bezto go wzieni ze sobom, ale przed meczym musieli go kerymuś dać. Wele naszyj chałpy zastawili jedna baba, a ta im padała, coby tego kocika puścili na nasz plac, bo tam miyszko tako dobro baba, co zwiyrzom przaje. Kocura momy do dzisio, dostoł na miano Bursztyn na pamiontka po tych synkach, co go prziwioźli, a łoni nos dycki łodwiydzom, jak sam grajom mecz.
– Jak płacisz dobrym piniondzym, taki som dostaniesz nazod! – tak dycki godała starka Hazelnuska, a łona jak małogdo sie na gyszefcie znała!
Roztomili, na tyn Nowy Rok życza Wom, cobyście we żywocie yno samych dobrych ludzi spotykali, a dobra, co go łod nich dostaniecie, jeszcze przimnożyli, amen!
Komentarze