Jo zaroz piyrszy dziyń szła ku omie a padałach co a jak, a łona tako macha zrobiła, jakby i psi miynso zeżarli a zaczła wylywać swoji żale:
– Zima? Stego ni ma żodnego pożytku, jo bych tak wolała ze dwa lata we kupie! Chocioż ciepło by było! A tak je zima, we piecku trza polić, wongel a drzewo do dom smykać a hasie na dwor wynosić... A pamiyntosz, jak żech łońskigo roku ukełzła na drodze, a nogach potrzaskała? Musiałach potym dwa tydnie leżeć we łożku a robota stoła... Dej ty mi pokoj ze zimom! Idź lepi ku starzikowi, łon możnej ci, co wymyśli.
Starzik we pywnicy szewcowoł a padoł yno tela, że łon tyż zimie niy przaje, bo go dycki rojmatyka we krziżu łupie!
I co jo boroczka miała robić? Na drugi dziyń zaczepiłach mamulka. Była sobota, a łona sie wziyna za robiyni przedświontecznych porzondkow.
– Ze zimy ni ma żodnego pożytku, yno tela ci powiym! Jo yno chodza sztyjc ze hadrom a wyciyrom delina, bo sie dycki kupa śniega naniesie, potym zaroz roztajo a wszyndy połno wody! Lepi idź ku tatulkowi, bo łon je wiyncy we szkołach uczony, no leć a niy przeszkodzej, jak niy pomożesz!
Tatulka potkałach we garażu:
– Co chcesz dziołcho, zima to je zima: we cyntralnym polić trza, a jeszcze nojprzod ło wongel się łobstarać, drzewa kupić u fesztra, potym wszystek pociońć na kuloki a porombać, a wszystek jo som, bo starzik już niy do rady... Już mi sie ta zima brzidnie, dobrze że chocioż garaż momy, bo rano ze autym ni ma starości!
Minoł tydziyń, a jo dali nic niy miała, już mi sie te pisani po nocach śniło! Zaroz po Nowym Roku przijechała ku nom ciotka Zuzka, nojmłodszo siostra łod omy. W doma godali, że to je pofyrtano baba, ale mie sie dycki śniom dobrze godało. We wieczor łona mi wszystek porozprowiała: że zima to je czas łodpoczynku, prziroda śpi pod śniegowom dekom, a dziecka majom feryje i kupa uciechy. Piontka za zadani żech dostała!
Komentarze