Jedyn roz łopedziała mi ło swoji przigodzie:
– Wiysz przeca dziołcha, że jo bez cołki życi była chudo a piersi żech miała taki sportowe, jak to godoł ujek Tyjofil. Łogromnie mie mierziało, jak łon sie za takimi babami-remondami łoglondoł, bezto pomyślałach se: jo ci tyż pokoża! Zabrałach sie tak fest do jodła, że Tyjofil błoznowoł, że lepi mie łoblykać, niż żywić, ale wielach niy przigrubła, a tam, kaj żech chciała, to wcale! Jedyn roz we sklepie u Ośnikow uwidziałach taki bistonosz, co mioł na miskach naszyte krałzki ze takij hrubszyj koronki. Baby godały na niego bistonosz ze różom. Kupiłach se taki, ale ujek ani niy pomiarkowoł, żech sie troszka zmiyniła. Jednako nojwiyncy pomog mi czysty przipadek! Za jakiś czos zaś kupowałach bistonosz, ale tyn roz we sklepie ze GS-u. Była tyż tam tako hrubszo baba, co brała to samo. Dziepiyro w doma kapłach sie, że sprzedowaczka sie kiwła a wydała nom towor na łopy, ale jak żech już była tak daleko, to żech se chocioż bistonosz przimierziła. Troszka na mie wisioł, ale łod czego je jegła a nici? Za kwila był akurat, a do miskow nacisłach waty! Potym delszy czos żech sie we tym sklepie niy pokozowała, coby niy chcieli tego bistonosza nazod, boch niy wiedziała, że tam rzeczy, choćby yno roz przimierzonych, niy bierom nazod ze wzglyndow higienicznych, tak mi padała jedna sprzedowaczka ze „Żaru”!
Jak sie łociepliło, Tyjofil kupił mi piykno, modro bluzka ze małym dekoltym, bo zdało mu sie, żech jakoś wyszwarniała. Łoblykłach se jom we niydziela do kościoła. Łogromnie rada szła żech pojstrzodkiym kościoła do komuniji, a świdrzyłach po babach, co se coś tam miyndzy sobom szeptały, niych widzom, że Stazyja tyż mo wszystek na swojim miejscu! To samo było nazod, ale jak żech doszła ku zadnim dźwiyrzom, chyciła mie za ramie ta gucho Porwoliczka a wyszeptała tak głośno, że wszyjscy na łokoło jom słyszeli:
– Wata wom ze cicenhaltra wyłazi!
A było po całej paradzie...
Komentarze