We dalszej familiji mom dwie gryfne dziołszki: Basia a Kasia, co som frizjerkami. Basia sie we inszym fachu niy widziała. Po zawodowce skończyła technikum, a byłaby szła dalij, ale zatym sztudyrowanio do frizjerkow ni ma. No, a na Kaśka dycki w doma godali „frelka mie sie niy chce!”. Frizjerkom łostała, bo jakoś szkoła skończyć trza, ale sie we tyj robocie niy widziała a godała, że łona by sie czuła nojlepi, jako paniczka „ze wyższych sfer”, yno że teroz takich ni ma! Bezto udowała kogo popadło! Isto sie ze fachym minyła, bo nejści dobro aktorka by śni była.
Dziołchy do dzisio rade kamracom a wszyndy społu chodzom.
Jedyn roz poszły na disco. Jak yno Basia prziszła nazod, wywołała zaroz swojigo brata do antryju.
– Posłuchej Hubertku, co ci powiym: były my ze Kasiom we „Bachusie” a spotkały my tam twojigo przemondrzałego kamrata Tymona. Jo wiym, że łon je mondry, bo dwa fakultety skończył, ale zagaić godki ze dziołchami niy poradzi! Jak żech to pedziała Kaśce, to łona sama go zaczepiła, a za kwila siedziały my przi jego stoliku! I wiysz, co mu nagodała? Że sztudyruje psychologijo! Kaj tyż na taki gupi pomyślonek prziszła, my som przeca zwykłe dziołchy, fach momy we rynce, a wywionzujymy sie śniego, jak sie patrzi!
– Niy łowijej, yno wol prosto, coście nawywijały! – Hubert stracił ciyrpliwość.
– Łona zaczła godać, że sztudyruje na UJ-ocie, no tam, kaj ty, to Tymek spytoł sie jom zaroz, jak sie nazywo jeji profesor łod parapsychologie, a ta gupio sie na to chytła a ciepła jakimś ciynżkim mianym. Tyn Tymon to je ale kawał gizda, ze niywinnom machom sie dali pytoł, eli je to profesor zwyczajny abo nadzwyczajny? Jo Kaśki kopała pod stołym, ale łona na to niy zważowała, yno za kwilka wystynkała, że je przistojny! Tymek sie łośmioł a padoł, że go jeszcze żodyn tak niy rozweselił, a postawił nom za to po coli! I tak skuli Kaśki my na gupie gynsi wyszły!
Komentarze