Recepty na kreple tyż były roztomańte, jedne – lepsze, drugi – gorsze, ale kożdy trzimoł swoja we tajymnicy. A jak już kerymu jom wyzdradził, to yno rombka uchylił, a nigdy niy pedzioł wszystkigo do końca!
Kreple dycki piykłach ze mamulkom, ale jak mi było ze szternoście lot, bez zima panowała epidymijo gripy i mamulka nom rozebrało praje przed Tłustym Szczwortkiym. Padałach se, że jo je dość wielko a tych krepli napiecza sama! Ale lekcy pedzieć, niż zrobić! Wszystek żech przirychtowała, ale tyj recepty niy poradziłach se łoroz spomnieć, bezto poszłach szterować mamulka, co leżała we łożku ze wielgom goronczkom. Łona mi praje wszystek przipomniała, ale widziałach, że te godani a myślyni fest jom morduje, beztoch dała i pokoj a szłach do kuchynie. Ciasto żech zagniotła a łostawiłach we misce, coby sie dźwigło, ale łone sie niy ruszało! Za godzina prziszoł do dom mój bracik, a spomiało mu sie, że trza ciasto przikryć a postawić do ciepłego, nojlepi pod pierzina! Mieli my teroz trocha czasu, bezto zagrali my se we warcaby, a za tyn czos nom ciasto z michy uciykło! Pozbiyrali my go łyżkom a dali nowo płachta do łożka, coby sie mamulka niy kapła, co my wymajstrowali! Potym my gibko ciasto przekulali a nafilowali marmeladom, a że już sie miało ku wieczoru, zaroz my sie brali za pieczyni. Ciynżko nom to szło, ale jakoś my te kreple do łostatnigo dopiykli. Jednako taki jak łod naszej mamulki niy były, chocioż podle jeji recepty. Nasze były zaciynżki a zamasne, bezto ani my ich wiela niy zjedli! Cołko micha łostała jeszcze na drugi dziyń. Rano mamulce było trocha lepi a padała nom, co my zrobili za felery przi pieczyniu: do ciasta niy dowomy omasty yno kieluszek gorzołki, olyj do pieczynio musi być fest gorki, ale sie niy polić, a potym trza jeszcze kreple na bibule potrzimać, coby niy były taki masne!
Teroz wszystek wiycie!
Komentarze