Miyszkała tam Agnes, starszo siostra łod moji omy, co se wziena chopa ze Zobrzo. Jak omie było łoziymnoście, łojce posłali jom nazod, coby pomogła siostrze przi dzieckach.
Roz Agnes musiała pojechać na cołki dziyń do Zobrzo, co za starej Polski było już za granicom. Miała być nazod dziepiyro na wieczor, a tu trza było uwarzić łobiod! Gyńś, co jom gospodyni zamiarowała upiyc, lotała jeszcze po placu. Oma jom chyciła a poszła do somsiadow, ale tam tyż niy było żodnego starszego chopa, coby ta boroka gyńś ło łeb skrocił. Już miała śniom iść nazod, kiej do tych istnych prziszoł elegancki panoczek pod fonsym, łobleczony we nimiecki, baniocki uniform. Łon gyńś zarżnoł, a jeszcze zaniosł jom dziołsze do dom, coby se szatow niy pokrwawiła. Moji omie dycki podobali sie starsze panoczki ze brzuszkiym, a nojlepi jeszcze we uniformie. Tyn sie i tym wiyncy widzioł, bo był gryfny, piyknie godoł po nimiecku i po ślonsku, mioł we Zobrzu ważne stanowisko a dobrze zarobioł. Za tydziyń we niydziela tyn baniok prziszoł ku nim ze somsiadym a padoł, coby chcioł ku dziołsze chodzić na zolyty. Agnes napisała ło tym do łojcow, a potym do roku modzi sie pożynili: omie było dwaścia a starzik był ło dwanoście lot starszy. Po ślubie przekludzili sie do Zobrzo, kaj starzik zawiadowoł stacyjom. Tam sie tyż narodziła jejich piyrszo cera, ale mój tatulek narodził się już we Baranowicach. Starzikow łojciec, co był gajowym nojprzod u von Durantow, a potym jeszcze we firmie Gische, skończył siedymdziesiont piyńć lot a szeł na pynzyjo. Teroz jego syn musioł go godnie zastompić! Bez cołki życi nasz starzik nosił yno uniform. Niy wiym, eli oma była tymu rada, że we szranku musiały wisieć dycki sztyry wybiglowane koszule a trzi uniformy: dwa do roboty, a jedyn łod parady? Tyn nojpiykniyjszy łoblykli my starzikowi na spotkanie ze Ponboczkiym. Wele niego we trule leżoł tyż jego jegerhut ze pyndzlym dziczyj szczeciny a ze piyrzami łod sojki.
Komentarze