Hań downi ludzie tyż wandrowali za robotom jako i dzisio. Ucyjka a Pietrek taki dwie biydne siyrotki ze gorow, co mało kej im na chlyb stykło, radowali się, że Ponboczka za nogi chycili, jak dostali robota we kaczmie, co stoła przi głownej drodze, ale tam niy było wcale tak piyknie, jak se myśleli. Robić musieli łod rana aż do poźnej noce, ani we niydziela niy śmieli iść do kościoła, bo we kaczmie porzad było połno ludzi. Uprosili se u kaczmorza, że chocioż we Wielgim Tydniu podom do spowiedzi, a we Wielkanoc na rezurekcyjo. Już we Wielgi Szczwortek najechało sie kupa gości, muzyka grała od rana do wieczora, a co kwila trza było wykulować ze piwnice nowe beczki ze piwym. Kaczmorzowo kapsa robiła sie coroz hrubszo, a łon som był coroz bardzi pragliwy. Bezto padoł, że na drugi dziyń do kościoła puści yno jednego, a tyn drugi, co łostanie, bydzie musioł robić za dwoch. Mode sie ugodali, że nojprzod podzie Ucyjka, a Pietrek łostanie w doma, za to podzie na rezurekcyjo, ale nic z tego niy wyszło, bo potym gospodorz zagroził im, że jak sie kaj ruszom, to ich wyciepie a jeszcze za robota niy zapłaci. We Wielgi Piontek pod wieczor do kaczmy prziszoł stary żebrok. Jeszcze nic niy padoł, a kaczmorz już kozoł go poszczuć psami, ale złe dycki psiska ani na niego niy szczekły, yno mu sie przilizowały, jako by go bez cołki żywot znały. Potym tyn żebrok wyloz na pojstrzodek izby a głośno wszyskim przipomnioł, że dzisio je Wielgi Piontek i Pon Jezus umrził, bezto wszyndy by miało być cicho jako we grobie. Ludziska przi stołach łeby pospuszczali, a żodyn sie niy łodezwoł, yno kaczmorz wylecioł zza szynkwasu ze takom hrubom lagom a zaczon prać starzika a furt go wyganiać. Wrzeszczoł przi tym, że sie starymu we łebie pomiyszało, bo jego gości straszy!
Łoroz we izbie pojaśniało, żebrok chycił za rynce Ucyjki a Pietrka, co stoli praje wele niego a bez słowa wykludził ich na dwor. Niy uszli ani daleko, jak zaś usłyszeli muzyka, a potym jakiś dziwny szum a plusk. Pietrek łobejrzoł sie za sie: starzik sie kajś stracił, a tam kaj jeszcze przed kwilom stoła kaczma były teroz bażoły zalote wodom, a w ni sie przeglondoł miesionczek.
Komentarze