Dziyń czekulady
Na szczyńści post nom sie już skończył i mogymy se niy yno pogodać ło maszketach, ale tyż troszka posmakować, bo isto ni ma takigo człowieka, coby ni mioł rod czekulady?
Jo czasym godom, że za słodkim „niy przepadom” i to je prowda, ale roz za czos tyż mie na paskudy ciongnie! U nos w doma, nasza cera mo łogromnie rada lody a mój ślubny chopeczek nojwiyncy przaje czekuladzie.
Niyroz se tak myśla, jako to było downi i co sie wtynczos maszkeciło, niż te kakało ze Ameryki prziwioźli i zanim te Francuzy prziszli na to, że sie do śniego czekulada zrobić?
Nasza starka Elza spominała, jak se za modu dycki na Godni Świynta pomaszkeciła, bo na stole stoły oblaty, słodki jabka, suszone śliwki, pieczki ze jabek a gruszek, pierniki, kołocze, dwie zorty łorzechow, czasym pora ruzynek, jak mamulce jaki łostały ze pieczynio, modro biksa połno szklokow i połniuśko asyjetka swojskigo miodu. Powiym wom, żech tela słodkości na jedyn roz nigdy we żywocie niy widziała!
Chocioż nasz tatulek we tych ciynżkich czasach (piyndziesionte lata), kej my ze bracikym byli bajtlami, kożdo wypłata ło nos pamiyntoł. Wiela niy zarobioł, ale dycki kupił nom czelulada, a bez zima tyż po apluzynie we kolorowym papiorku! Maszketami zarzodzała mamulka. Apluzyna my se mogli zjeść zaroz, ale trza było dać po konsku starce, tatulkowi a mamulce, za to czekulady to my dostowali yno po kosteczce na dziyń!
Roz za czos ku naszej starce przichodziły kamratki. Kożdo starka nom, dzieckom, prziniosła dycki po bombonie. Teroz to by sie żodyn bajtel na jednego bombona danego ze rynki ani niy podziwoł, bo co rusz dostowo cołko tytka, ale wtynczos kożdo kapka słodkigo sie liczyła! Pamiyntom jak moji starsze kamratki kupowały miyszanych bombonow za dwaścia groszy i dostowały aż dwa, ale pomiyszać se musiały same! Wiynkszina sfas tamte czasy czynżki do naszych łojcow, ale do nos nojpiykniyjsze, isto pamiynto!
Teroz to se czekulady kożdy może kupić wiela chce, a je i wiela roztomańtych zortow: mlyczno, czorno, ze ruzynkami, ze łorzechami i ze paprykom i kajtam jaki smaki, ale wiycie, że mie już ani tak niy smakuje jako downij, kej sie jom yno konszczyczek dostowało!
Komentarze