Powiym Wom prowda: dycki mi to po gowie łaziło, eli tako mucha to je rychtik stworzyni łod Ponboczka, bo jak je śni pożytek? Ludzi żere jak wściekło, chorobska roznosi, jodło kożde zepsuje, a nojwiyncy ze wszystkich chroboków toplo sie we gównie!
Co inszego tako pszczoła! Łona miod robi, a jak kerego bajsnie, to mu to jeszcze rojmatyka wylyczy, tak przinajmnij godoł nasz doktor, chocioż jo by tego niy chciała probować na swoji skorze! Nikerzi godajom, że majom na gift łod pszczoły uczulyni a mogom sie łod tego rozchorować, ale to je mały feler, jak pod rozwaga weznymy wszystki korzyści!
Musi coś być na rzeczy, bo starzi ludzie bojajom, że bezmała we tym stworzaniu rogaty tyż swoji pazury moczoł, coby Pana Boga poszterować a fest ponerwować!
Ponbóczek se chcioł wyrychtować pszczoła, bo we Raju były łogromnie szumne łonki połne roztomańtego kwiycio i serce go bolało, coby sie telki dobro miało zmarnować, jak stego mog być nojsłodszy na świecie miod! Po poru probach jego plan sie powiodł, a diobła, co sie na to dziwoł zza rajskigo płota, chyciła łogromno zowiść i tyż zapragnoł mieć takigo robotnego chroboczka, ale skond go mioł wziońć? Ponboczek sie niy chcioł śnim podzielić, bo som mioł yno jednego, bezto dioboł musioł se go zrobić som! Probowoł bez cołki tydziyń i wyszeł mu tyn chroboczek cołkiym podany na pszczoła, ale łon chcioł mieć jeszcze lepszego, coby Ponboczkowi nosa utrzić, a na to Pon Bog ni mog pozwolić! Żol mu było diobła, chocioż to gizd był łogromny, bo łon by sie łod tyj pychy rozpuk, bezto trocha popsuł mu szyki i tak ze nadzwyczajnej pszczoły wyszła mucha masara, co zamiast robić miod, na żołto yno... sami wiycie co...
Jeszcze za bajtla słyszałach, jak starki rozprowiały, że Ponboczek stworził yno te pożyteczne stwory, zaś dioboł, co tyż chcioł mieć swój zwierziniec – coluśkie te giździarstwo: roztomańte muchy, kopruchy, krowski bonki, ślypce, łosy, szerszynie, gady a żaby.
Teroz to by sie na nos ekologi pogorszyli za taki godki, bo godajom, że kożde stworzyni mo swoji miejsce we ekosystymie, co je jak werk łod zygarka, jak jednego trybka braknie, to cołki werk stanie!
Komentarze