Ludzie, co majom ksiyngarnie abo w nich robiom, godajom, że ni ma stym tak wesoło! Kożdy rok coroz myni ludzi wyciongo piniondze ze kapsy, coby se jako ksionżka kupić, a jak już kery sie zdecyduje tyn grosz wydać, to kupuje nojwyżyj jedna!
Jo tyż mało ksionżek kupuja, bo ani wiela czasu na czytani ni mom. Łońskigo roku na Dzieciontko dostałach aż dwie ksionżki: jedyn leki kryminał, co był taki ciekawy, żech go smogła za dwa dni, i powiyść psychologiczno, co jom czytom do dzisio! Mom w doma wielgi szrank ze ksionżkami i niyroz sie starom, co jo stym wszystkim zrobia, jakby mi prziszło wykludzić sie na jaki myjsze pomiyszkani, bo spolić szkoda... Mogła bych dać do jaki bibliotyki, ale tam tyż niy wszyski ksionżki chcom! A co jo tam mom, sie spytocie? We wiynkszości szkolne lektury, co mi ich jeszcze łojcowie pokupowali. Czytali ich tyż nasze dziecka, bo ci starsi do szkoły chodzili, zanim jeszcze nastały „lektury szkolne z opracowaniem” abo streszczynia tych delszych. Mom tyż kupa ksionżeczek ze serii „Koliber”, a w nich literatura światowo, chocioż ponoć łocenzurowano, a we starym, mahoniowym regaliku troszka literatury fachowej, albumy a mapy. Przi robiyniu porzondku znojdom sie czasym prawdziwe „perełki”, do przikładu: ksionżka „Jak naprawić samochód Syrena”, cała seria gazetek „Zrób to sam”, co majom ze trzidziyści lot i na wiela sie już niy zdajom, abo „Poradnik wiejskiej gospodyni” ze piyndziesiontych lot. Jakimu profesorowi socjologie jeszcze by sie isto zdały do napisanio prace naukowej, ale nom już som na nic.
We biurku mom pora tomikow poezyje, co jom napisali moje znajomki, krom tego wiersze ksiyndza Twardowskigo, a ze polski literatury „Dzieła wybrane” Mickiewicza a Słowackigo. Za to mój chopeczek zebroł se cało kolekcyjo modlitewnikow a kantyczek ze XIX wieku. Gańba sie prziznać, ale bojki a wierszyki, co łostały po naszych dzieckach, trzimia we skrzince z papendekla we antryju na garderobie, ale teroz prziszoł tyn prawy czas, coby zaś nazod były w zocy. Wczora po szkołce prziszła ku nom nasza wnusia, coby „babuni” zaśpiywać ślonsko pieśniczka a pedzieć ze pamiynci konsek „Lokomotywy” łod Tuwima.
Komentarze