Mojigo kamrata Pietra sie dycki szpasy trzimajom. Na drugi dziyń po swojich urodzinach chcioł, coby go syn zawiozł do znajomka. Som za kierownica niy siadoł, bo niy czuł sie cołkiym czyrstwy. Zefek przistoł na to, yno padoł, że musi nojprzod cosikej jeszcze we Urzyndzie załatwić. Na parkingu było połno i synek łostawił auto pod szkołom, co stoła po somsiedzku. Zefek szeł załatwiać, a tatulek sie na kwilka zdrzimnoł we aucie, łoroz usłyszoł za łoknym jakiś ciynki głosy. Łodewrził troszka prawe łoko i uwidzioł dwie dziołszki ze gimnazjom, co dziwały sie na niego bez szyba.
– Chyba niy żyje? – pytała sie jedna drugi, potym troszka łodstompiły a zaczyny dzwonić kajś komorkom.
– No to jo wos teroz wystrasza! – pomyśloł se Pieter, bo praje namacoł we kapsie sztuczny ślyp, co mu go kamraty do urodzinowej flaszki przilepili skuli tego, że go tak przezywali, bo we kontroli robił. Wcisnoł gała na prawe łoko, a chcioł jeszcze ku tymu wyplynzić jynzor, ale doszeł do wniosku, że bydzie lepij, jak pokoże zymbiska! Bez dobro kwila nic sie niy dzioło, a gymba mu zaczła pomału ciyrpnońć łod tyj krziwej machy, co jom zrobił. Naroz usłyszoł buczek, na plac wjechała sanitarka, a za kwila ze zadku stanyło jeszcze drugi auto. Ze karetki wyleciała modo doktorka, a za niom ku aucie podleciały te mode dziołszki, co go znodły. Za moment łodskoczyły wszystki trzi a narobiły wrzasku! Ze zadnigo auta wyskoczyli dwa mode policjanty, podziwali sie bez kwila na Pietra, a potym zaczli sie rzać jak konie i chocioż łon sie dali niy ruszoł, jedyn zaklupoł na łokno a padoł:
– No dość już tej zabawy, proszę wysiąść!
Wol-niy-wol Pieter musioł wylyźć. Zanim stanoł na ziymi, wypodł mu tyn sztuczny ślyp, a chocioż sie schylił a szukoł rynkami we marasie, bez bryli niy poradził go dojrzeć!
– Co, piło się, a teraz jedzie się samochodem? Będzie mandat! – padoł łostro tyn piyrszy policjant, a drugi wyciongnoł alkomat. Pieter dmuchnoł i chyba łod strachu wyczyrstwioł, bo nic niy pokozało. Policjanty sie naradzili, a potym pedzieli chopu, że mandat za trzista złotych dostanie za „zakłócanie porządku publicznego”. To był nojdrogszy szpas, jaki Pieter wystrugoł!
Komentarze