Zaśpiywej mi słowiczku majowy!
Jedna rzecz Wom moga pedzieć, tyn ptok śpiywo, jak żodyn inszy! Gdo go chocioż roz słyszoł, dycki bydzie czekoł na maj, coby go zaś posłuchać. Jak ludzie widzom małego, szarego ptoszka we parku abo na zegrodce, to ani im do gowy niy przidzie, że to je tyn wielgi nocny śpiywok. Je wielgo szkoda, że łon niy śpiywo bez dziyń, bo by sie wiyncy ludzi mogło radować jego śpiywkom, ale tyn ptoszek woli zolytować poźno we wieczor abo we nocy i wtynczos wyśpiywuje nojpiyknij na świecie! Jeszcze tak ze dwa-trzi lata nazod to wele moji chałpy tyż słowiki we maju śpiywały, bo we nocy było cicho a cima. Zaczynały kole dziesiontej-jedynostej wieczor, podle tego, jaki był dziyń. Jak było fest ciepło, to sie dycki rozśpiywały troszka poźnij, ale niy trwało to wiyncy jak trzićwierci godziny, no chyba, że sie kery zagapił, ale taki to dycki śpiywoł nojgłośnij, a potym nowo porcyjo śpiywu mieli my dziepiyro ło trzeci nad ranym. Wtynczos poradziło sie łodezwać i pora naroz! Co jakiś czas, jak żech niy musiała wczas rano stować, nastawiałach se budzik na trzecio, łotwiyrała łokno a słuchałach tego koncertu, czasym godzina abo i wiyncy! Jak sie zaczło rozwidniać, prziłonczyły sie tyż insze ptoki i chocioż kożdy robił to na swoja nuta, to sie tego ze przijymnościom słuchało! No ale teroz już tak ni ma! Wele Żorów pobudowali nowe drogi i chocioż som dość daleko łod nas, to kożdo noc straszne larmo łod nich idzie, bo głos sie nojlepi niysie po nocnej rosie. Ale nojgorsze je światło. Markety, bojiska, place zabaw, to wszystek je łoświytlone bez cołko noc i boroczki ptoszki łod tego gupiejom, bo noc je podobno do dnia! Za łostatni dwa lata u nos fest ptokow ubyło. Bez dziyń to sam jeszcze przilatujom czasym krom srokow, cukrowki, wroble, szternadle a pinkawy, ale gniozdow na prawie kożdym stromie na zegrodce abo we żywopłocie już niy widać! Dycki było tych ptokow tela zortow, że jo ich ani pomianować niy poradziła. Jak wele nos stromy porosły, to sie sam pokozały leśne a parkowe ptoki, ale yno na kwila, bo miasto za nimi prziszło a ich wygnało! Momy teroz wygody a wszyndy blisko, ale bez ptokow je markotnie!

Jedna rzecz Wom moga pedzieć, tyn ptok śpiywo, jak żodyn inszy! Gdo go chocioż roz słyszoł, dycki bydzie czekoł na maj, coby go zaś posłuchać. Jak ludzie widzom małego, szarego ptoszka we parku abo na zegrodce, to ani im do gowy niy przidzie, że to je tyn wielgi nocny śpiywok. Je wielgo szkoda, że łon niy śpiywo bez dziyń, bo by sie wiyncy ludzi mogło radować jego śpiywkom, ale tyn ptoszek woli zolytować poźno we wieczor abo we nocy i wtynczos wyśpiywuje nojpiyknij na świecie!
Jeszcze tak ze dwa-trzi lata nazod to wele moji chałpy tyż słowiki we maju śpiywały, bo we nocy było cicho a cima. Zaczynały kole dziesiontej-jedynostej wieczor, podle tego, jaki był dziyń. Jak było fest ciepło, to sie dycki rozśpiywały troszka poźnij, ale niy trwało to wiyncy jak trzićwierci godziny, no chyba, że sie kery zagapił, ale taki to dycki śpiywoł nojgłośnij, a potym nowo porcyjo śpiywu mieli my dziepiyro ło trzeci nad ranym. Wtynczos poradziło sie łodezwać i pora naroz! Co jakiś czas, jak żech niy musiała wczas rano stować, nastawiałach se budzik na trzecio, łotwiyrała łokno a słuchałach tego koncertu, czasym godzina abo i wiyncy!
Jak sie zaczło rozwidniać, prziłonczyły sie tyż insze ptoki i chocioż kożdy robił to na swoja nuta, to sie tego ze przijymnościom słuchało! No ale teroz już tak ni ma!
Wele Żorów pobudowali nowe drogi i chocioż som dość daleko łod nas, to kożdo noc straszne larmo łod nich idzie, bo głos sie nojlepi niysie po nocnej rosie.
Ale nojgorsze je światło. Markety, bojiska, place zabaw, to wszystek je łoświytlone bez cołko noc i boroczki ptoszki łod tego gupiejom, bo noc je podobno do dnia! Za łostatni dwa lata u nos fest ptokow ubyło. Bez dziyń to sam jeszcze przilatujom czasym krom srokow, cukrowki, wroble, szternadle a pinkawy, ale gniozdow na prawie kożdym stromie na zegrodce abo we żywopłocie już niy widać! Dycki było tych ptokow tela zortow, że jo ich ani pomianować niy poradziła. Jak wele nos stromy porosły, to sie sam pokozały leśne a parkowe ptoki, ale yno na kwila, bo miasto za nimi prziszło a ich wygnało! Momy teroz wygody a wszyndy blisko, ale bez ptokow je markotnie!

Komentarze

Dodaj komentarz