My, starzi, debatujymy, coby poźni iść na pynzyjo, mode tatulki aż kwiczom, coby swoji babeczki posłać nazod do roboty, bo sami niy poradzom zarobić na familijo, yno tych dziecek maluśkich sie żodyn niy pyto, eli im sie to wszystek widzi, bo dziecka a ryby głosu ni majom! I tak te maluśki boroczki, coby sie jeszcze mamulczynej kecki trzimać mieli, muszom iść do szkołki abo do jakiś „prziłotanej „ciotki, co sie nimi zajmie, jak tatulek ze mamulkom na chlyb bydom robić! Teroz sie jeszcze jako starka trefi, co je już na pynzyji, abo starzik, co sie czasym bajtlym w doma zajmie a na szpacyr wykludzi, ale za pora lot łostanom yno taki starziki a starki, co przidom na pynzyjo, jak sie im wnuki żynić bydom! Potym to już yno prawnuki kolybać bydom mogli, ale człowiek już ni mo na starość ani tela siły, ani trwanio!
Dyckich miała nerwy na takich łojcow, co to godali, że ni mogom mieć wiyncy dziecek jak dwa, bo ich niy wyżywiom, a niy wyuczom, ale dzisio sie niy dziwuja ani tym, co majom nojwyżyj jedne. Downi sie godało, że jedynoki sie źle chowajom, drugim mało przajom, bo dycki wszystek było yno do nich, ale wtynczos jeszcze łojcowie sami dziecka chowali!
Dzisio, jak taki mały mo trzi lata to idzie do szkołki abo do „łopiekunki”. Moja wnusia tyż chodzi do połednia do szkołki a potym je snami. Taki porzondek mo swoji dobre strony, maluśko sie nauczyła grać ze dzieckami a śpiywać roztomańte pieśniczki, ale kole połednia dycki jom ciongnie do dom a czeko aż dziadek po nia przidzie! W doma momy śniom kupa uciechy, ale nikedy nom tyż już siły brakuje, bo to je taki „żywe strzybło”! A co bydzie za dziesiynć lot, eli nom sie bydzie chciało jeszcze jaki dziecka bawić? Nikero starka, co podzie na penzyjo kole siedymdziesiontki, bydzie wolała troszka se dychnońć a niy użyrać sie jeszcze ze dzieckami! Łojcow zastompiom szkołki a szkoły, ale gdo tym dzieckom do konsek serca? Skuli braku czasu żodyn śnimi niy pogodo a przoć drugim ich niy nauczy! Wychowajom sie samopas a ze familijom bydom sie widzieć yno roz za pora lot: na Komuniji, na weselu a na pogrzebie, niy dej Ponboczku doczkać takich czasow!
Komentarze