Co lepszy fajrować imiyniny abo urodziny (nikerzi godajom gyburstag)? Jo mom jedne wele drugigo, bezto moji znajomki przichodzom kej chcom i potym świyntuja cołki tydziyń! We familiji mom samych Ślonzokow. Łoni dycki przijyżdżajom we dziyń urodzin abo we nojbliższo niydziela. Cołki szczyńści, żech się narodziła bez lato, bo skoro kożdy dziyń je ciepło a idzie se siednońć na zegrodce. Roz za czos grilujymy (szkoda, ze ni momy na to naszego słowa, chyba, żeby: pieczymy wuszty?), kedy indzi siednymy se we altance przi kawie a kołoczu, bo mom poblisku dobro piekarnia i choć som niyzapedziane goście to, dycki keryś domownik po kołocz skoczy.
Nojwiyncy uciechy je jednako ze powinszowanym. Som tacy, co dycki godajom to samo, bo inaczy niy poradzom, a moja jedna kamratka kożdy rok winszuje tak, jak za bajtla, chocioż godo, że starej babie to niy przistoji, ale nic inszego niy wymyślała!
Nojpiyknij a nojkrocej mi winszuje jedyn mój profesor łod malowanio (jo tyż dycki ło jego urodzinach pamiyntom)! Tyn chop kożde lato rajzuje po świecie, bezto ze życzyniami dzwoni dziepiyro, jak przijedzie nazod do Polski, ale zawsze powiy coś mondrego a łod serca, jo jeszcze tak niy poradza!
Zaroz po powinszowaniach zaczyno się godka, co jom ni mom wcale rada. Wiela ci to rychtik je lot? Ty byś miała być nejści tyn rocznik, co moja siostra? Jakby wszyjscy łoroz zapomnieli, co żech łońskigo roku godała, abo że sy mnom do szkoły chodzili? Nasza somsiadka, pani Stynia, co była kejś aktorkom, dycki godała, że „kobiety o wiek się nie pyta, bo już od trzydziestki jest tylko młodą kobietą aż do śmierci” i łona sie nigdy niy prziznała wiela lot miała. Że była starszo, niż my se myśleli, to my sie dowiedzieli dziepiyro, jak umrziła.
Za moich modych lot żodyn tego, jak je stary, niy ukrywoł! Starka łod Cilki dycki sie kwoliła, że je i bez łoziymdziesiont, a jeszcze na kole jeździ, wszystek kole siebie zrobi a na dodatek modym (co już tacy cołki młodzioki niy byli) łobiod nawarzi! Ło starych ludziach godało sie wtynczos, że som leciwe!
Wiycie, że jo nikedy se myśla, że lepij we dzisiyjszych czasach fajrować imiyniny, bo żodyn sie niy pyto kere!
Komentarze