Trzech takich kamratow szoferow, kerzi robiyli dokupy na jednyj rybnickij bazie, wrocali grubo po połnocy z muzyki, kero jejich firma organizowała w zakładowyj świetlicy. Jedyn śnich miyszkoł w Leszczynach, a dwóch miejscowych odkludzało go na banhow. Sami szli bez babow, bo tyn Leszczyn był jeszcze kawalyr, a od rybniczan baby poszły same du dom. Byli już blisko banhowa i przechodziyli kole gablotow z przodownikami pracy, kere tam na ulicy Kościuszki stoły. Kareł z Maroka padoł: Chopy! Podziwejcie sie na tego łysego, to jest moj ujec, kery na grubie Chwalowice norma szpanuje. Od tego hełmiska już durch wyłysioł. Jo bych mu szkuty domalowoł, kebych mioł czym. Poczekej, padoł Alojz, jo mom w kapsie od baby kosmetyczka, bo mi jom do mantla wcisła w szatni przed tom muzykom, możno tam co bydzie do malowanio. Rychtyk było już czym malować ujcowi szkuty na glacy i Kareł już sie broł do otwiyranio tyj gabloty. Niyszło to jednak tak łaps i musioł ta szyba z przodku wyciść, co mu sie nawet fajnie udało, bo pynkła yno na trzi czyńści, kere szło potym wyjonć. Lipynsztiftym mu Alojz nojprzod lica pomalowoł, a cołki braunsztift wytytroł tymu karłowymu ujcowi na glacy. Rzali sie potym głośno jak małe bajtle i kombinowali, jak by mu tu dać jeszcze pociągnyć gorzołki z flachy, kero Richard mioł w kapsie. Tak kombinowali, aż niy wiadomo skąd znojdli sie dwa milicyjanty przi nich. Skończyło sie na tym, że ich zawiyźli na milicjo i trzimali do wytrzeźwiynio. Potym cołko trojka musiała sie na kolegium stawić, kaj bez mała śmiychu było dużo, jak tyn protokoł czytali, ale płacynio tyż mieli niymało, totyż do dzisioj to pamiyntajom.Drugi taki fal zdarził sie we Pszowie. Tyż mniy wiyncyj w tym samym czasie sie to dzioło.Była wtedy tako moda, że w nikerych miasteczkach na rynku abo na jakim skwerku stawiali rostoliczne klamory wojskowe. Były to fligry, kanony czy jaki stare czołgi, kere sie już niy nadowały do użytku.W Pszowie tyż postawiyli na skwerku przi rynku taki ruski fliger – mig-15.Fajnie sie tam prezyntowoł taki strzybny odrzutowiec i podobało sie to wszystkim, a już nojbardzij dzieciom.Jedyn roz tyż to było w zapusty chyba, jak jakiś oddział z gruby mioł muzyka w domu kultury, a muzyka była już fest rozkryncono, to dwoch hajerow ze swojim sztajgrym oddziałowym, kerymu na grubie „Krol waglo” godali, chcieli se wypić na boku flaszka, ale tak, coby ich baby niy widziały. Poszli wtedy w nocy ku tymu fligrze i tam ta flacha obulili. Potym sztajger wloz do kabiny miga, a swojim hajerom kozoł na skrzidłach legnyć i udować silniki, bo mioł chyńć sie trocha polotać, jak godoł. Silniki takie larmo robiyły, tak głośno wyrczały, ze ludzi z pobliska to obudziyło i zadzwonił keryś po milicjo. Tak tyż zanim fliger unios sie do luftu, milicjo była na miejscu. Godka była krotko – silniki po „górniku”, a pilot „Kopernika”*. „Krol waglo” se z tego nic niy robiył, bo szpasu mieli co niymiara, a hajerom strata prymiom wyrownoł.Starsze pszowiki do dzisioj o tym pamiyntajom.
Komentarze