post image

Bōło tam piyknie: lasy a wysoki gōry, ale nojpiykniyjsze były tam gōrolski dziołchy. Staśkowi sie jedna uwidziała, a se jōm za pōł roku po wojsku wziōn. Jejimu tatulkowi sie niy widziało, że modzi mieli dostać pomiyszkani aże na szōstym sztoku we nowym familoku, a Stasiek skuli tego mioł iś robić na gruba. Ale co mioł zrobić, jak modzi se przoli? A sōmsiod tyż sie troszka wtynczos boł, że mu jego Marcyjanka bydzie jakiś gōrolski fitki warzić, ale ôna gibko nauczyła sie ôd swoji szwigermutry warzić po naszymu i starości niy bōło aż do dziś dnia!.
Tak ze dwa miesiōnce nazod familijo ze Małopolski pytała naszych sōmsiadōw na weseli. Ôni szarpli sie zaroz na piykny gyszynk, no, bo przeca ludzie ze Ślōnska bele czego niy fōndujōm! Jednako Stasiek bōł jakiś markotny, a na te weseli jechać niy chcioł. Zdało mi sie to troszka dziwne, bo za modu po muzykach ôgrōmnie rod lotoł! Jednako prziszoł tyn czas, że trza sie bōło zbiyrać! Ôba sie wysztiglowali, auto umyli, gyszynk zapakowali a pojechali! A co sie tam na miyjscu wydarziło to wiym ôd Marcysie. Sala kaj mieli ôbiadować, bōła fest wielgo a piyknie przistrojōno. Ale Stasiek mioł porzad tako macha, choby ôctu popiył, bo ni mōg se siednōnć kaj chcioł, yno musioł szukać wizytōwki ze swoim mianym. Trefiło im siedzieć wele takich dwōch modziokōw, co ich niy znali. Nojprzōd prziniōśli jakoś wymyślato zupa, co sōmsiadōm niy smakowała, a potym bōło dłōgi czekani na drugi dani. Coby jako godka zagajić, Stasiek sie spytoł swojigo sōmsiada po lewyj strōnie, eli ślōnski klōski sōm? A ôn sie yno ôśmioł, a ôdpedzioł: Nie są! W kōńcu jodło na drugi dani prziniōśli, jednako zaś tych ślōnskich klōskōw niy bōło, no to sie Stasiek jodła niy chytoł! Marcysia już tego niy strzimała, a spytała sie go czamu niy jy? A ôn, zły jak stodiosi, ôdpedzioł: na klōski czekom, bo jak ich niesōm, to we kōńcu prziniesōm, ale isto ôd samego Krakowa idōm!
Jak sōmsiady byli nazod spytałach sie, jako sie im wesele widziało, a Stasiek ôdpedzioł yno tela:
– Usranie! Bo gōrol, choćby i tyn ze gōrōw i tak Ślōnzoka niy zrozumi!

Komentarze

Dodaj Komentarz

Twoj adres e-mail nie będzie opublikowany.