Jak sama pedziała, chciała sie przekonać, czy Ślonzoki bydom mieć odwaga i niy bydom sie wstydzić po swojimu godać. Tyn piyrszy konkurs pokozoł, że Ślonzoki niy zapomnieli godki, kerom ich prastarziki godali od setek lot, choć w czasach PRL-u musieli sie śniom kryć. Som pamiyntom, jak mi wmowiali nikerzi, że ze ślonskom godkom daleko sie niy zońdzie, bo kaj sie gymba otworzi, to zaroz nos poznajom i wyśmiywajom. Tukej zaś w doma cołki czas sie yno po naszymu godało i wszyjscy my sie dobrze rozumieli. W szkole to co inkszego, na kożdym kroku nos poprawiali, totyż człowiek musioł umieć godać dwojako. Pamiyntom, jak moje siostrziczki przed zdrzadłym trynowały ta poprawno polszczyzna, jak wykrziwiały gymby przi wymawianiu nikerych słow. Jak sie niyskorzij pokozały piyrsze magnetofony szpulowe, to niyjedyn, co chcioł zdować egzamin na uczelnia, nagrywoł godzinami te swoji polski godanie i na nic sie to zdało, bo profesor z Krakowa zaroz spytoł: „Z jakiego śląskiego miasta przyjechałeś?”. No ja, my tyż zaroz poznomy człowieka z „Bożych stron”, choćby niy wiym jak sie po naszymu staroł godać.Te konkursy pokozoły, że niy wstydzymy sie naszyj godki, że niy wypiyromy sie naszego pochodzynio i że som my śniego dumni. Przeca naszo ślonsko godka była piyrszo i śnij dziepiyro zaczli tworzić niyskorzij ta bardzij uczono, kero teraz nazywo sie jynzykiym literackim.Minyło już dwanoście lot od tego piyrszego konkursu i co roku przibywo nowych laureatow. Rozrosła sie ta nasza czelodka. Co roku spotykomy sie na rostolicznych imprezach, kere zwykle organizujom ci świyżo upieczyni laureaci, i wtedy dopiyro idzie pedzieć, że jednak ta nasza godka żyje i jako jest piykno.Ostatni nasze spotkanie miało miejsce w Szyrokij, a zaprosiła nos wszystkich Otylia Rusek, łońskoroczno laureatka konkursu „Po naszymu...”. Widzicie jom na tyj fotce razym z paniom synator Mariom Pańczyk. Trefili my sie 12 listopada w sali NOT-u przi grubie Borynia. Tilka ze swojim zespołym Drugo Młodość ze Szyrokij ugościyła nos po krolewsku. Zaś 10 grudnia możecie trefić wszystkich laureatow w kościele w Ligockij Kuźni o trzecij po połedniu, kaj zacznie sie „Wilijo Ślonzokow” z inicjatywy Betiny Zimończyk, Ślonzoczki roku 2001.UTOPEK
Komentarze