Kocur ani niy dyrgnył, yno lyniwie za nimi łoczami wodziył, tak choby im w tych wyścigach syndziowoł. Ta najstarszo była już tak zbestwiono, że na spaniu Albinowi szkuty z fonsa pougryzała i gniozdo, kere pod delinom miała, nimi se wymościyła. Wszystkie myszy i skuli tego zowiściyły. W nocy, jak Albin był na zolytach u somsiadow, to dziepiyro miały raj te myszy. Rostoliczne breweryje se robiyły. Było by tak długo jeszcze twało, keby niy jedne zdarzyni. Nojmłodszo cera od gospodorza, Zofijka, kero już ze szkoły wyszła, prziniosła se książka z biblijotyki i czytała jom jak zawsze na leżance w kuchni. Była tak fest przemynczono, bo musiała przi skludzaniu pomogać, że yno pora szkartek przeczytała i usnyła przi tym. Książka i z rynki wypadła i wleciała pod leżanka, kaj cołko noc przeleżala. Albina niy było w doma, toż myszy juzaś nowo graczka miały. Śleciały sie wszystkie z cołkigo gospodarstwa. Kożdo była ciekawo, co tyż tam w pojszczotku jest napisane? Jednak żodno czytać niy poradziyła, krom tyj nojstarszyj. Nauczyła sie czytać doś downo tymu. Było to wtedy jak gospodorzowi w tym samym miejscu gazeta śleciała, a łona prawie nowe gniozdo pod delinom robiyła. Szrotowała ta gazeta i literki przi tym łykała aże sie nauczyła czytać. Zarozki tyż ta Zofijczyna książka łotwarła i zaczła głośno czytać myszom, kere obstompiyły jom nałokoło. Co konszczek przeczytała to ugryzła i na kupka ciepała. To mi sie na gniozdo przido! –prawiła. Była to książka o jakijś tam Kleopatrze, kero sie w oślim mlyku kompała, żeby wiecznie młodo być.Od dzisioj mi bydziecie Kleopatra godać! Jutro sie tyż okompia! Ale niy w mlyku, yno w czymś lepszym! – kludziyła ta przemądrzałka.W pywnicy stoji pełno maśniczka śmietonki, tam sie okompia!Wszystkie myszy zaroz zaczły piszczeć z uciechy, że tyż bydom miały swoja królowa Kleopatra, yno jeszcze ważniejszo, bo przeca w śmietonce sie bydzie kompać.Jak staro mysz pedziała, tak tyż zrobiyła. Z samego rana poszła do pywnice z cołkom chormijom mysij bandy, tam kaj stoła maśniczka. Wskoczyła wezgiernie na nia, dźwigła korluszko i do śmietonki wskoczyła. Myszy zaroz: hura! Niych żyje Kleopatra!Niy trwała ta uciecha długo, ktoś zaczon ślazować po schodach do pywnice. Myszy zaroz zaczły piszczeć: Wyłaź Kleopatro! Gdoś idzie do pywnice! – i gibko sie po kątach pochowały. Była to Kasperczyno, kero prawie po ta maśniczka szła, żeby masła nadziałać.Kleopatra była tako wniebowziynto przez te kompani, że nic niy słyszała i uciyc niy zdążyła. Ani sie niy spodzioła, jak sie w kuchni znojdła przi piecu. Jak gospodyni poszła po ryczka do lauby, to sprytno Kleopatra fuk z maśniczki, cołko śmietonkom oblepiono, prosto na Albina. Kocur tam prawie społ po zolytach, ale sie zaroz łobudziył. Chocioż niy był głodny, ale mysz w śmietance - tego jeszcze niy próbowoł. Drapko jom capnył pazurami i nim Kasperczyczka prziszła z ryczkom, z wielkim smakiym Kleopatra schrustoł.Utopek
Komentarze