Kejś szło dziwoko świnia potkać yno we lesie, a to jeszcze niy we kożdym. Potym zaczły wyłazić na pola, a szkoda gospodorzōm robić, a terozki idzie ich potkać we wieczōr we mieście a na ôsiedlach, jak las je kaj po blisku. Ta nasza cywilizacyjo, niy yno ludzi wyszkolyła, bo ta dziwoko zwierzina tyż sie wiela nauczyła! Nojprzod tego, że jak kaj som wiynksze kupy ludzi, to tyż tam je do zwiyrzōw jodło, bo ludziska kupa swojigo zbytecznego jodła do hasiokōw wyciepujōm. Styknie tam iś, hasiok ȏbalyć , a gościna je gotowo. Potym zwiyrze prziszły na to, że autōw, chocioż wyrczom boć sie niy trza, styknie im yno pod pyski (czytej koła) niy lyź. Jak przidziesz ku ludziōm we wieczōr, żodyn cie niy pogōni, bo ludziska wczas idōm leżeć a spać!
Z drugij strōny ze tōm naszōm przirodōm ni ma jeszcze tak źle jako to nikerzi przedstawiajōm. Jak żech bōła pora lot nazod we szpitalu we wodzisławskich Wilchwach, to my, pacyjynty na zajōnce a sorniki sie bez ôkno ze salōw dziwali. Potym zaś bōłach we szpitalu we katowicki Ligocie. Tam po parku pod wieczōr te dziwoki świnie ze modymi lotały. Te mode to były tak bez matka wyszkolone, ze ôna piyrszo bez alejka przeleciała na drugo strōna, a potym puszczała te swoji pasiate maliki po jednym. We nikerych miejscach ludzie sami tym stworōm jodło ciepali. Bezto ône sie nauczyły, że jak przidzie do lasa, abo parku czowiek, to isto cosik im przinios, a coby to dostać, to trza za nim lecieć! To prawie skuli tego sie słyszy, że dziwoki świnie ludzi pogoniły.
Kōnsek ôd nos, tam kaj miyszkajōm moji przociele, to jedna dziwoko świnia poszła rzykać do Pōnboczka! Do lasa tam ni ma daleko, bezto już przodzi ludzie widywali dziwoki świnie na kościelnym placu, ale ta bōła tak frechowno, że rajń sie wryła! Niy przeszkodziyło ji ani dwoje dźwiyrzy. Bez mszo szła se pojstrzodkiym kościoła, potym obleciała farorza a wlazła za ołtorz. Tam kwilka poszturała, a zaroz potym wleciała do boczni kapliczki, a niy chciała wylyź chociaż jōm dwa kościelne wyganiali, ale we kōńcu wylazła do tych swojich pobratymcōw, co stoli na kościelnym placu. Po mszy już ich jednako niy bōło, a wiyncy sie niy pokozali, chociaż nikerzi prorokowali, że za tydziyń bydzie ich wiyncy, a ludzi do kościoła niy dopuszczōm.
Grymlino
Komentarze