- Patrz ! Tego bych se niy pomyśloł. Jeszcze niydowno stoła yno jedna na cołki Rybnik i tankmajster ni mioł co robić.- Jak to niydowno?No przeszło piyńćdziesiąt lot nazod, jak jo mioł swój piyrszy motorcykel. Kupiył żech go na odpłata, na talon górniczy. Była to fajno, nowiutko, czorno SHL-ka. Z przodku już miała teleskopy i zic z takimi wielnoskimi fedrami. Siedzioł żech na nij paradnie, choby mie na złotego konia posadziyli. Starce Reginie, jak żech przijechoł na zolyty, paniynki miały wyglajzować, a synki z pół wsi prziśli jom łoglondać. Przodzi żech jeździył na „Diamancie”, a teraz naroz na motorcyklu, umisz se to przedstawić?Tankowoł żech jom na tyj jedinyj tankszteli, kero na placu Wolnośći była. Tankmajster musioł takom wajchom fachlować, aż sie naplompała na wiyrchu w tym sztyndrze jedna z dwoch piyńćlitrowych krauzow, na kerych były nacechowane litry. Potym przeszaltrowoł inkszo wajcha i ślatowało to szlauchym do baku.Autów w Rybniku tyż było tela, żebyś ich na palcach policzył. Bynzyny była yno jedna zorta i miała czerwono - różowy kolor. Nojgorzij to mieli szofery z ciynżkich autokow, bo musieli sami tom wajchom plompać. Jak mu trefiyło ze sto litrow tankować, to mu pazura spuchła, zanim zatankowoł.Jo do mojigo motorcykla to nojwyzyj dwie te krauzy broł, a to yno wtedy jak już bak był durch suchy.Jak żech potym sztartnył spod tanksztele, to bajtle leciały za mnom na wyścigi, żeby se powoniać trocha tego kurzu z auspufa....!Dzisioj, jak by sie tak moj starzik obudziył i ujrzoł wiela tych autokow przez miasto przejedzie, to by ani z chałpy niy wyloz, bo by mioł strach przez droga przelyść...!
Komentarze