Jak żech była mało, przichodziła ku nom starka Drobiczka a czynsto spominała swoji młode lata, co ich przeżyła we dworze we Bziu, kaj jeji tatulek przi koniach robiył.
Tam dycki było prawe żniwne. Panoczek ze swojom paniczkom a dzieckami wyloz ku ludziom do parku, dobrze wszystkich ugościł a jak zagrała muzyka, to se nojprzod zatańcowoł ze swojom paniczkom a potym tyż ze babami ze wsi a ze dwora. Ludzie mieli go łogromnie radzi, bo kaj mog, to pomog. We Bziu dycki żniwowali maszynami, a bezto jeszcze wiela kłoskow na polu łostało. Po zwozce ludzie mogli zebrać kłoska, co na ziymi leżały, a na podzim pozbiyrać zimioki za skibom. Wiela kery unios, tela było jego. Starom drogom ku Bziu chodzili ludzie ze cołkij łokolicy. Przed wojnom starka ze mamulkom tyż tam roz zaszły, choć to je kawał drogi. Kożdo prziniosła po wielgij trownicy kłoskow. Mamulka była wtynczos jeszcze mało, jak szła to ta trownica prała i po piyntach a nogi miała cołkie zeżgane łod łości. Starka kłoska wymłociła a ziorka zemleła na żarnach, jadło sie potym bez dwa tydnie yno same prażonki, bo starzik mioł bezpłatny turnus we żorskij hucie.
A dzisio ze tym żniwnym to je tak. We nikerych wsiach po mszy ludzie idom do szołtysa abo do wiynkszego gospodorza, tam mu zaśpiywajom, chlebiczek prziniesom, chop ludzi ugości kołoczym a piwym, abo do „po jednym” a potym idom wszyjscy na festyn tańcować.
U nos we parafiji som możnej ze dwie gospodarki, kupa familoków i aż dwa wielgi działkowe łogrody, bezto kościoł strojom działkowicze, gospodorze piekom chlyb a baby ze kołka rożańcowego pletom żniwno korona. Tak ze trzi lata nazod jedne frechowne babsko rozgodało, że pampoń, co mioł chlyb przirychtować, kupił go we piekarni na rynku. Łońskigo roku zaś sie i niy zdała korona ze kłoskow. Godała, że kwiotki w nij som ze papioru a jabka chrobaczywe, zaś banie pod łołtorzym pod nogami postawione. Tako baba to poradzi łostudy narobić! Nasz somsiod, co jom dobrze znoł, godoł, że trza jom dobrociom wykończyć a padoł i tak: - Roztomiło somsiadeczko, wzieni byście sie do roboty a pokozali naszym babeczkom, jak to rychtik mo być!
Baba, chocioż wyszczekano, bez słowa łostała, bo sie taki godki niy spodziywała!
Komentarze