Jo se to moga przedstawić, bo autym niy jeżdża prawie skuli tego, że ni mom prawa jazdy. Za kierownicom siedziałach yno roz na polnej drodze. Strachu żech sie najadła a dałach se pokoj ze motoryzacjom.
Som jednako ludzie, co im skora ciyrpnie, jak pomyślom ło tym, co by to było, jakby sie im auto zepsuło. Niy dali by rady dziesiyńć miejscow łobskoczyć, do roboty by niy dojechali, zakupow niy zrobili, dziecek do szkoły a szkołki na czas niy dowieźli a Bog wiy, co jeszcze by niy dali rady zrobić, to niy dziwota, że im mrowce po plecach lotajom.
Z jednej strony te auta som fest pomocne, bo zamiast nosić ciynżki tasze ze towarym, wciepujymy je do auta, a za kwila my som w doma, abo jak chcymy wybrać sie kaj dalij, to niy muszymy czekać na cug, yno siodomy a jadymy. Bezto uszporujymy kupa czasu a nerwow, ale na tym świecie ni ma nic za darmo! Auta smrodzom, a zatruwajom luft, co nim dychomy, ale chocioż se to uświadomiomy, to zrezygnować ze wygody kożdymu przidzie ciynżko!
Jedni autom przajom fest, insi troszka myni. Mój znajomek, co miyszkoł we Zobrzu, dycki wszyndy jeździł yno miejskimi autobusami a bankom. Do służbowych jazdow mioł szofera, ale po robocie dycko wszyndy lotoł piechty, a jak sie śniego ludzie śmioli, to godoł, że to je na zdrowie! Na szterdzieste urodziny kamraci podarowali mu tak do szpasu taki maluśki autko – graczka, a łon se to wzion do serca i łod tyj gańby se auto kupił, chocioż niy potrzebowoł. Prawo jazdy zrobił roz-dwa, ale mało jeździł, a yno na krotki trasy, widać ni mioł serca do tyj motoryzacyji!
Za to mój chopeczek rod spomino, jak za bajtla trzi razy do dnia pucowoł łojcow motor a porzad sie napiyroł, coby tatulek doł mu sie karnońć! Łon dycki rod jeździł autym, ale łostatnimi czasy czynsto norzykoł, że autow je na naszych drogach zatela a skuli tego trza mieć łoczy nałokoło gowy! Łońskigo roku padałach mu, coby som mioł dać dobry przikład, ale niy liczyłach, że tak zrobi! Dzisioj moj ślubny mo auto yno na daleki trasy. Po mieście jeździ dycki na kole, a wszystek gibko załatwi, bo we żodnych korkach a na krziżowkach niy stoji.
Komentarze