Piyrwej w kożdej chałpie trza było przed zimom wiela rzeczy do jodła naskludzać. U mojij starki we komorze dycki były miechy ze monkom, na fachach stoły boncloki ze szpyrkom, miyszki ze grochym, fanzolami a pogańskimi krupami, wisiały tyż sznurki ze suszonymi jabkami a grzibami, wionki czosku a cebule, a na ziymi leżały wielgaśne banie. Po drugij stronie mieli my grodza na zimioki, bo te pomiyszkani było bez pywnice.
Na som koniec października kisiło sie kapusta we wielgij beczce, co jom starzik Johan kupił łod bednorza Gładysza jeszcze za staryj Polski. Skiż tego było kupa roboty a marasu. Trza było pożyczać maszyna do kronżanio, beczka wykulać, zaloć wodom, a na drugi dziyń piyknie wymyć a wyparzić. U nas dycki chopy kronżali, bo trza było mieć trocha grajfki a siły, coby te głowki kapusty do kronżoka ciś a pazurow se niy urżnońć! Baby kapusta łodbiyrały a sypały do waniynek a koszykow. Dziepiyro jak sie wszystek pokronżało, brało się za kiszyni. Moja starka dowała do kapusty małe jabka, markew a czerwiono ćwikiel, coby kwaska miała fajny kolor, ale insi dowali, co tam kery mioł rod.
Potym keryś chop mył nogi a loz do beczki kapusta deptać. Jo żech tyż roz sie łogromnie napiyrała tego deptanio, ale mi padali, że jo je za leko, chocioż mi „połfuntek” godali! Jednako coś mi tu niy pasowało, bo żech nigdy niy widziała baby kapusta deptać, bezto łaziłach za starkom, coby mi to wyjaśniła. Łona padała, że to skuli tego, że baby majom miynki charakter i kapusta by miynko była. Za to jedyn starszy kamrat ze placu tuplikowoł, że to bezto, że baby downij bez galot chodziły! Niy wiedziałach, kerymu mom wierzić, ale długo żech se tym gowy niy zawrocała!
Jak sie kapusta ukisiła, to ale było jodło: zimioki ze kwaskom na wieczerzo, żur ze kwaski abo kapusta ze tartym kartoflym na łobiod, a nasza somsiadka, co była rodym ze wschodnij Polski, warziła dobry bigos. My sie tego łod nij nauczyli, bo nom tyż smakowoł.
Wspominom se jeszcze, jak starki dycki starszym dziołchom przikazowały:
– Pamiyntejcie se frelki: ze żuru chop jak z muru, ale yno łod kapusty chop tłusty!
Komentarze