Trzi tydnie nazod dałach sie namowić kamratce na podzimowe wywczasy. Pojechali my ze chopym na cołki tydziyń do jeji chałpki pod lasym. Krom kamratki a jejigo ślubnego byli tam jeszcze nasi znajomi ze Rudy, wszystek zapolone grzibiorze! Łod rana do wieczora lotali po lasach, grziby smykali połnymi koszami, a mie przipadło to wszystek przirychtować do suszynio! We lesie byłach yno roz. Szłapy mie rozbolały łod łażynio, a cołko byłach zeżgano łod kopruchow. Jednako sama siedzieć we cudzej chałpie to tyż ni ma wesoło! Jedyn roz, jak wszyjscy poszli do lasa, jo sie trocha zdrzimła, bo żech mało w nocy spała skuli rejmatyki. Łobudził mie dzwonek. Podziwałach sie do łokna, a tam wele furtki stoji jakiś chop ze koframi a coś woło. Aże mie strach łoblecioł! Cudzy chop pod furtkom, a jo tu sama w cudzej chałpie pod lasym, a do nojbliższego somsiada bydzie ze trzista metrow. Człowiekowi dycki co nojgorszego przidzie do głowy! Wyjrzałach bez łokno, ale dali żech niy rozumiała, co tyn istny godo, bezto musiałach podlyźć bliżyj. A tak żech se myślała: Tyn chop bydzie tak stary jak jo abo troszka starszy, to tak zaroz bez tyn płot niy przeskoczy! Jakby co, to jo skocza gibko do siyni, a dźwiyrze zarygluja... chyba żeby sam mioł kaj pokrytych jakich pomocnikow.
Ale teroz się wycofać było już za poźno.
– Jo je Hajnel, Cilczyn kuzyn! – przedstawił sie tyn chop. – Mieli my sie sam spotkać dzisioj rano a iść na grziby, ale był wypadek na drodze, bezto żech sie spoźnił!
– Ale łona mi nic niy godała, że na kogoś czeko, wiycie co, jo do nij zadzwonia – łodpedziałach mu, a jak sornik skoczyłach ku chałpie. Zaparłach dźwiyrze i dzwonia na Cilczyno komorka, a łona mi sie łodzywo na byfyju. No to jo już zadzwoniła, padom se!
– Co padała Cilka? – woło tyn chop spod furtki. Wszystek żech słyszała, boch łokno zapomniała zawrzić, bezto żech sie zaroz wychyliła a łodpedziałach:
– Kozała wom poczekać! Pod furtkom!
Ze hukiym zawrziłach łokno a niy słyszałach, co tam jeszcze godoł!
Grzibiorze prziszli dziepiyro za trzi godziny, a chop był taki zmarzły, że ani godać niy poradził, ale jak dostoł gorkigo tyju, to mi wyboczył!
Komentarze