Za moich modych lot robiłach pod firmom, co miała kontrakty we Wyngrach, skuli tego jednego roku na wiosna cołki nasz dział pojechoł na wycieczka do Budapesztu. To było we tych czasach, co na takij turystyce szło tyż zarobić, niy było tego wiela, ale chocioż sie za droga wrociło, a to cożeś se łobejrzoł, a przeżył toś mioł na iber! Nasz kamrat, Antek Piontek, co delszy czos u tych Madziarow robił, radził nom, coby my wielkich rzeczy niy brali.
– Nojlepsze som polski kosmetyki: parfiny a te farbiczki do malowanio łoczów! – padoł. – Yno trza wiedzieć kaj sprzedać! Na dworcu wos łobskoczom, ale tam fest goniom policaje, bezto najlepszy sie handluje we hotelu! I mioł prawie! Te wszystki paniczki, co tam robiły porzondek, prziszły potym ku nom niby ze ryncznikami, a to, co my mieli, do imyntu wykupiły!
Łostatni dziyń dostali my bilety na rejs po Dunaju, a potym nos zakludzili na rychtik dobry, madziarski łobiod. Antek chcioł sie przed nami pokwolić, że poradzi godać we tym dziwokim jynzyku, bezto zaroz jak my wleźli do restauracyje, zagodoł kelnera a łon mu pokozoł na pojstrzodek sale a nom kozoł siodać do takigo łogrodzonego kamerlika. Jodło nom dali taki libeźne, jak do małych dziecek, a jedyna łostro rzecz, to była marynowano, czerwiono papryka we szałatce ze tomatow, tyż libeźno! My już zjedli drugi dani, a Antek porzad jeszcze czekoł a ślypiami przewracoł, bo łod głodu wydzierżyć niy poradził. Łoroz ze zadku wylecioł chop we kucharski czopce ze wielkim garcym we rynkach a walił prosto ku Antkowi. Naloł mu śniego zupy a postawił zbonek wina na stoł.
– Widzicie, te szwargotanie po jejimu sie mu łopłaciło! – padoł Francik Dulymba, co coluśki czos dowoł pozor na to, co kamrat robi.
Antek rozkroł citrona a wcis trocha zaftu do zupy, potym chycił sie jodła, ale do gymby wsadził yno jedna łyżka, bo za moment zaczon prać luft rynkami. My zgupieli, yno Francik kapnoł sie, co sie dzieje. Wyskoczył na pojstrzodek a ze cołki siły zaczon klupać kamrata po plecach! Antek cołki stoł łoforskoł, ale przeżył, chocioż ta łostro papryka ze rybnej zupy mu fest zaszkodziła, bo potym bez trzi dni był zachrapuciały!
Komentarze