Starka Paulka, co była wtynczos modom mamulkom, roz za czos dostowała bolynio gowy. Szterowały jom dziecka, jeść nic niy poradziła, bo na nic ni miała smaku, a łogromnie przi tym była słabo! Rechtorowo baba godała, że to je migryna, ale starzik Karlik wiedzioł swoji: babow we kieckach sie taki pański choroby niy chytały!
Jedyn roz bez przipadek znod lykarstwo na starczyne boleści i jak yno Paulka zaczła norzykać dycki zaprzongoł konia a jechoł do Rybnika. U nojlepszego masorza kupowoł ze trzi krance wyndzonego wusztu. Ku tymu broł jeszcze flaszeczka dobrej gorzołeczki abo gronowego wina i miyszek żymeł, co aż trzeszczały we zymbach! Czasym prziwiozł jeszcze biksa malckawy! We tyn dziyń starka niy śmiała wylazować ze łożka, a starzik Karlik som bez niczyji pomocy warził wieczerzo. Nojwiyncy sie na nia radowały dziecka, bo kożdy bajtel dostoł tych miejskich szpecyjałow na spróbowani. We wieczor starka łoblykła sie jak na niydziela a cołko familijo siodała do wieczerze. Przed jodłym starzik naloł swoji Paulce maluśkigo sznapsa, jak to robili u wielgich państwa we dworze, kaj za modu za byamta robił!
Po tym porzykali a po lekuśku zabrali sie do jodła. Karlik łobdzielił swoja czelodka żymłami a kożdymu doł pora plackow wusztu. Do dziecek taki wyndzony wuszt niy był zdrowy, bo długo na żełondku leżoł, ale im tyż doł na sprobowani, coby im sie niy zachciało! Paulka dostała cołki wioniuszek a ku tymu jeszcze ze dwa kieluszki tyj dobrej gorzołeczki abo słodkigo wina. Na koniec czekała jom dobro malckawa ze śmietonkom, ale tego bajtle już niy loglondały, bo szły zaroz po wieczerzy spać. Jak sie poschraniało ze stoła, to łojce se siedli wele pieca, troszka pospominali, ło tym jak sie po piyrsze spotkali a do sia zamiłowali. Długo niy siedzieli, bo rano trza było wczas stować ku gowiedzi. Jak zygor ze wogami wydzwonił dwanoście szli spać. Rano starka stanyła zdrowo a wesoło jak szkowronek!
Moja starka Elza dycki spominała te tatulkowe lyczyni a godała, że łon musioł mieć ku tymu dar łod Boga, bo doktory to na choroba piguły abo zioła radzili, a starzik Karlik yno dobrym jodłym lyczył.
Komentarze