Jo już teroz ni ma na rajzy, bo mi zdrowie niy pozwolo wybrać sie we daleko droga. Bezto czasym troszka żałuja, bo wiela rzeczy żech jeszcze niy widziała, niy furgałach nigdy fligrym, anich niy jechała na kameli... Ale za modu to było cołkiym inakszy: jeździło sie do gorow, bo som blisko, byłach pora razy nad morzym (tym naszym!), na jeziorach, we Czechach, na Wyngrach i we „Dydyerach”, a wielach sie najeździła na kole po łokolicy!
Pora lot nazod byłach tyż w tych „Rychtik Fajnych Niymcach” na byzuchu u bracika i piyrszy roz mi sie zdało, że je teroz wszyndy jednako: te same sklepy a te same towary, yno piniondze insze! Prziznom sie Wom, że łod tamtego czasu już sie tak niy raduja jako downi, jak se co fajnego do obleczynio kupia! We Niymcach kupili mi łogromnie piykno bluzka, co kupa kosztowała, ale jak żech przijechała nazod moja kamratka miała tako sama. To by mi niy wadziło, yno łona jom kupiła we eleganckim sklepie „na wyprzedaży”, za nasze złotki i to jeszcze marne, podle tych euro, co tam za nia moji przociele zapłacili. Bezto do dzisio mie serce boli, jak se na nia podziwom!
Kejś, jechać na zagraniczno tura, a nic se niy prziwiyźć, toby żodnymu do gowy niy prziszło, wyjazd sie musioł wrocić! Pamiyntom jak my poczotkiym siedymdziesiontych lot byli na wycieczce we Rostocku. Za te pora marek, coch dostała na ksionżeczka walutowo, kupiłach se stylonki, co w nich niy leciały oczka, dwie czekulady, pora kartow ze widokami a bal do granio na plaży. Zjadłach tyż dobry łobiod a reszta drobniokow miałach we kapsie.
Jak mody, polski celnik łobejrzoł mój bagaż, to sie rzoł jak koń, aż mu płaczki po licach leciały, ale za kwilka padoł groźnie:
– Dziewczyno, gadaj zaraz, gdzie wszystko ukryłaś, bo my potrafimy być nieprzyjemni!
Jo zgupiała: niby sie śmieje, ale po mie wrzeszczy! Na pomoc prziszła mi jedna starka:
– Wstydzilibyście sie chopeczku! – wyskoczyła na niego wkurzono. – Jo tyż mom yno tela, co we tym koszyku, to jo skuli tego, tyż sie mom szykować na tyn przeglond?!
Na ta haja wloz starszy wojskowy, co papiory sprawdzoł a kozoł nos przepuścić. Mody yno pokryncił gowom, isto nom niy dowiyrzoł!
Komentarze