Za łostatnich sto lot wiela sie we tyj modzie zmiyniło. Nojprzod baby ustrzigły se kecki, coby pokozać konsek nogi, a teroz to oblykajom taki krotki szaty, że im zadek widać!
Troszka niyskorzi chyciły sie galot i trzimajom sie ich do dzisio, jo tyż ku nim noleża a godom tak, jak starka łod moji kamratki: yno we galotach baba je zicher!
A wiela łachow sie już niy oblyko, a nikerzi, ani niy wiedzom, co to je habela abo strombanty?
Roz żech znodła we szuflodce tako fotografijo, kaj żech rozpoznała moja oma za modu. Na gowie miała taki śmiyszny plaskaty hutlik i trzimała na klinie maluśko dziołszka we biołych szatkach. Ta maluśko, co wyglondała na dwa latka, zdała mi się jakoś znajomo, bezto żech sie spytała: gdo to je? To był ... mój tatulek! Synkom do dwoch rokow tyż habelki łoblykali. To były taki płocienne szatki zapinane abo wionzane ze zadku. Niy trza było pod to dować bajtlowi pieluchy ani galotkow. Ponoć dziecka we habeli sie gibci nauczyli robić do topka, bo jak sie roz-drugi zejscali, to szłapki mieli mokre a jeszcze czakało ich mycie dupki zimnom wodom, to potym już pamiyntali, kaj to sie taki rzeczy robi!
Isto nikerzi z Wos pamiyntajom galoty ze klapom, bo sami w nich chodzili abo kaj widzieli, bo we piyndziesiontych latach taki szprytny łach po ujku abo ciotce czasym bajtle jeszcze oblykali! Ze jednej strony troszka śmiyszne, ale z drugij – praktyczne. Ci, co dzisio projektujom nasza „bielizna”, tyż ze tych mustrow korzystajom, a nom ani do gowy niy przidzie skond ich wziyni!
A co baby a dziecka oblykały, jak niy było tych rajtuzow, abo po polsku: rajstopow?! Ano pończochy, usztrykowane w doma abo potym już taki makowe ze sklepu! A na czym sie to wszystek trzimało? Na haltrach abo strombantach łod tych czasow, co guma wynoleźli, bo pryndzy to sie ich sznorkom pod kolanym wionzało! Nasze starki to se zamiast normalnej gumowej podwionzki zwykłe guminy do krałzow ku pończochom zakłodały.
A wspominocie se chopskie fuzekle bez tego gumowego ściongacza na wiyrchu? Mój tatulek jeszcze za modu oblykoł taki haltry zapinane pod kolanym.
I tak by my se mogli jeszcze długo a długo przipominać...
Komentarze