Moja kamratka Cilka mo kwiaciarnia na rynku we somsiednij miejscowości. Sama dziecek ni mo, ale im łogromnie przaje. Bezto kożdy rok na Dziyń Matki rychtuje kupa tanich puketow, coby kożdy bajtel mioł co prziniyś swoji mamulce. Dycki brała kwiyci łod starki Gomuliczki, ale starka umrziła łońskigo roku na podzim, a na wiosna już gdoś inszy gospodarził na jeji działce a wszystki kwiotki wyplynił i Cilka musiała iść po prośbie ku inszym działkowcom. Tego, co tam nakupiła, niy było wiela, a stykło i yno do połednia.
Kole trzeci prziszoł ku ni maluśki syneczek, tak ze drugij klasy, mioł yno piyńć złotych, a puket chcioł wielgi! Kedy indzi to by niy było starości, boby nakładła roztomańtych łozdobnych liści a jakich zegrodkowych kwiotkow, a swionzała piyknom szlajfkom, ale wtynczos sie i wszystek pokończyło! Jak tak medytowała, co małymu pedzieć, spomniało sie i, że mo jeszcze taki maluśki kwiotki we doniczce i szło by ze tego coś wykombinować, yny że to by niy był wielgi puket! No, ale łod czego momy gowa? Jak nos prziciśnie, to dycki cosikej sie wymyśli! Kozała syneczkowi poczkać, a sama chyciła siekocz a skoczyła na plac. Jak żodyn niy widzioł, urżła pora gałynzi, a za kwilka była nazod. Potym piyknie wszystek drotkiym powionzała, łokrynciła tym doniczka, a przyłożyła jeszcze dwubarwno szlajfka, co już downo ze mody wyszła, ale tu pasowała jak uloł. Łogromnie piyknie i to wyszło, że aż sie sama dziwowała! Jo se myśla, że to wszystek bezto, że do tej roboty wsadziła konsek serca, a to dycki procyntuje! Maluśki był łogromnie rod, podziynkowoł, a za kwila go niy było!
Na drugi dziyń ze samego rana Cilka miała telefon ze gminy. Zaroz jom strach łoblecioł, bo sie boła, że możnej kery widzioł, jak targała gałynzie przed kwiaciarniom a poszeł na skarga, ale to yno dzwonił jedyn ważny panoczek, a chcioł taki som puket jak tyn, co go widzioł we internecie. Kwilka to trwało, niż sie dogodali, ale wyszło na to, że mamulka łod tego małego syneczka wyfotografowała tyn kombinowany puket a pokwoliła sie nim na Facebooku!
Cilka zamówiyni przijyna, ale boła sie, że teroz bydzie musiała łoszkubać wszystki krzoki wele rynku!
Komentarze