– Kaj som moji cwergi?! – tak ryczoł Bynek Miozga, co mo działka wele Francka Makulika, a lotoł jak łoszalały po cołkij działkowej zegrodzce.
– Niy godej, że ci tyrpasliki ukradli? – dziwowoł sie Mikuś Hazok, co był rodym łod czeski granice.
Jak Francik to usłyszoł, tyż zaroz polecioł na swoja zegrodka. Łokozało sie, ze łonymu tyż sie straciły te dwa nojpiykniyjsze a nojnowsze krasnoludki!
To wszystek zaczynało wyglondać na jakoś afera, bezto chopy sie dogodali, coby zawachować na złodzieja, ale yno na godce sie skończyło! Bo choć z wieczora zeszli sie we budzie u Francika, to nojprzod ze nudow zaczli grać we szkata, a potym gospodorz wyciongnoł halba i ani sie niy spodzioli, a po połnocy spali już jak maluśki dziecka. We tyj nocy tyż sie straciły dwa krasnoludki, tym razym na drugim końcu działek u Jonka Magiery.
To sie niy mieściło we łebie, żeby to zrobili jaki łebonie do szpasu, bo te figurki były fest ciynżki i daleko by ich niy zawlykli! Wtynczos spomniało sie Makulikowi, że we miejscu, kaj kejś miała zegrodka starka Jakubino, co je już bez dziesiyńć lot u Ponboczka, stojom jakiś dwa namioty. Na szczyńści niy było tam żywej dusze, yno jejich siedym figurkow!
– Niy bierymy ich nazod, bo muszymy chycić złodzieja na goroncym uczynku! – padoł Hazok. – A potym podymy na policyjo...
Ale po połedniu policyjo sama prziszła ku nim. Makulik dostoł telefon, że sie mo stawić na komynda. Tam na siyni spotkoł sie ze starym Miozgom.
– Niy wiysz, co te nasze najduchy nawywijali? – dopytowoł sie Bynek, łogromnie wkurzony na wnuka.
Za kwila sprawa sie wyjaśniła. Mody Miozga ze Antkiym Makulikiym, wnukiym łod Francika, chcieli ukraść ze łogrodniczego sklepu figurka Krolewny Śnieżki!
– Co wom tyż do łeby strzeliło! – nerwowoł sie starzik Makulik.
– No bo krasnale już momy, yno Śnieżki nom brakowało... – wystynkoł Antek. – My chcieli zrobić disnejland do małych dziecek...
Synczyska dostali za kara na grochu poklynczeć bez godzina, ale „disnejland” na Jakubinej zegrodzce już stoji! Ło to sie postarali starziki: Hazok, Miozga a Makulik i pora jeszcze inszych działkowiczow a som pon prezes Łyżka kupił ze swoji kapsy figurka Śnieżki.
Komentarze