Terozki to już małokery wiy, co te słowa znaczom. Tak sie kejś godało na ludzi, co swoji roli niy mieli, a na cudzej gospodarce robili.
Pamiyntom, jak ta łogromnie staro gorolka, co ku naszej starce ze warzeszkami a rogolkami przichodziła, godała, że jeji ziyńć kludził swoji maluśki dziecka do bogatszych somsiadow, jak im yny piyńć lot minyło, bo taki bajtel mog już gynsi paść! Jak żech to podsłuchała, to żech potym bez pora nocy spać niy poradziła, bo żech sie boła, że mie tyż keryś bez wiedzy łojcow może kajś wykludzić! Taki dziecka-boroczki to yno kupa biydy a złego traktowanio wyżyły!
Mojimu starzikowi (tatulkowi łod moji mamy) było dziesiyńć lot, jak mu mamulka umrziła, a jejich łojciec sie ło dziecka potym już niy staroł, bo sie po drugi łożynił. Bezto ich rozebrali dalsi przociele a siomsiady. Na gospodarce musieli robić jak stare a zjedli tela, co ptoszek!
A spani mieli we chlywie ze gadzinom! Mój starzik ani szkoły podstawowej niy skończył, bo ważniyjszo była robota na gospodarce! Jak spodł roz ze somsieka, to se krziż tak fest potrzaskoł, że chodzić niy poradził, bezto leżoł pora tydni we masztali, a jeść a pić niy mioł mu gdo podać! Możnej by ani tego niy przeżył, ale ulitowoł sie nad nim chop, co konie we dworze lyczył a na nogi go postawił, jednako wybito opatka mu łostała do końca żywota!
Hańdowni być „starom pannom” abo „starym kawalerym”, to tyż leko niy było, bo kaj taki człowiek mioł iść? Jak niczego ni mioł, mog se yno służby szukać we świecie abo robić za darmowego pachołka abo dziywka u swojigo braterstwa, co na łojcowej gospodarce łostowało! Taki borok robił łod rana do wieczora za łyżka jodła a konsek łoblyczo, co mu gospodorze kupowali roz na pora lot, jak stare łachy śniego spadły!
Najyntym pachołkom a dziywkom trza było dać płat za robota kożdy rok na św. Szczepana, a swojim niy płaciło sie wcale! Nojgorsze jednako było to, że tych „swojich” nojbliższo familijo za gupielokow jakich miała, co to na godka ze innymi ludziami czasu by niy mieli tyrmanić, yno fest harować! Widziałach to wszystek, kej żech po wsiach ze szkolyniym jeździła. Byłach modo, ale serce mie nad tym bolało!
Komentarze