Niydziela Palmowo abo Kwietno

Hań downi na szczworto niydziela Postu godali we kościele „niedziela róż”, a że u nos jeszcze te kwiotki niy kwitły, to se jom ludzie pomianowali po swojimu, a godali na nia kwietno. Jak mi niy wierzicie, to przijedźcie do Żorow a idźcie se do farnego kościoła świyntych apostołow Filipa a Jakuba, tam wele zakrystyji momy nagrobek ze XVII wieku. Je tam pochowany żorski kupiec Girzi Latany ( po naszymu Jerzy Łatany), co umrził trzi dni przed niydzielom kwietnom. Napis je po morawsku, ale leko go poczytać idzie, bo morawski był do polskigo podany. Napisałach, że był i to je prowda, bo już downo sie tego jynzyka niy używo, a nikerzi go ze jynzykiym czeskim mylom, co sie w nim pisać zaczyno jednako troszka niyskorzi (XVIII/XIX wiek).
U nos Wielgi Post przipado po połowce lutego, two cołki marzec a czasym i konsek kwiytnia, to je tyn czas, co już momy wiosna na karku, ale kwiecio wiela niy uświodczysz! We lutym, to kwitnom na zegrodkach a we lasach przebiśniegi a śnieżyczki, ale ni ma ich wiela i jo musza sie przyznać, że naszego, ślonskigo miana łod tych kwiotkow niy znom, jak kery ło tym cosikej wiycie, to mi go napiszcie. We marcu u mie na zegrodce pokazujom sie żółte a lilowe szafranki (krokusy) a we kwiytniu modre kukołki (szafirki), ale jo se sama ich tam nasadziła, a ze polnych kwiotkow to co nojwyżyj na polu abo na niyużytkach potkać idzie podbioł a gynsi pympki. Te łostatni, jak yno śniyg ślezie zaroz sie pokazujom, ale wioniuszka śnich niy do sie zrobić, bo som za krotki. Jak je ciepło, to poczontkiym kwiytnia momy narcyźle a potym tulpy, a we lasach insze drobne biołe a żołte kwiycie (zawilce), ale musza sie wom przyznać, że jo go tyż po naszymu pomianować niy poradza, krom pietrowych kluczykow (pierwiosnki), co ich wszyjscy znomy. Dziepiyro po Wielkanocy przichodzi czas na fijołki a nasze mlycze żółte a potym na kwiotki roztolicznej barwy, a jo sie już tego doczkać niy poradza.

6
Baner reklamowy

Komentarze

  • Grymlino Do Stanika 04 kwietnia 2015 20:56Dziynkuja Wom za informacyjo, jak żeście ło tym napisali, to mnie sie tyż spomniało, że nasza somsiadka na śnieguliczki godała: sznyjgloki. Spolnymi siłami by my te wszyski kwiotki pomianowali po naszymu, jeszcze roz Bog zapłać za pomoc!
  • Stanik z Rybnika Do Grymlinej 01 kwietnia 2015 11:07Grymlino jeszcze ni se spomnialo ,Zawilce Starka mianowała (Hanenfuski ,abo Annemonki ???
  • Stanik z Rybnika Do Grymlinej 01 kwietnia 2015 10:52P. Grymlino fajnie losprowiocie po noszymu aż mi się ciepli robi we duchu jak te naszkryflane po noszymu czytom , Grymlino Starka godala na:(Sniezynki-sznyjfloki) we rostomantych farbach rosly na zegrodzie , a we lesie jino biole .A na :(Snieżyczka,Przebisnieg-sniyggloki tysz ino biole. Nie poradza pedziec czy zech to rychtyk mianowol bo to je już moc czasu nazot kaj wele 60 lot.
  • Grymlino. do karlusa 29 marca 2015 13:50Dziynkuja Wom za komyntorz! Moja starka tyż godała siyrotki na bratki, a te insze kwiotki u nos na zegrodce niy rosły, bezto niy wiym jak sie miamowały. Na żonkile(te żołte) to my godali narcyzle, ale moja kamratka, co miyszko we drugi wsi do dzisio godo harcyźle (tam godajom już po cieszyńsku!) Fajnych Śwint życza , a serdecznie pozdrowiom!
  • Stanik z Rybnika Stanik z Rybnika 28 marca 2015 23:11Po Śląsku nazywają się się Frilingviolki , sznyjviolki.
  • karlus Witom Pani Grymlino 28 marca 2015 20:17Jo yno pamiynca, jak moj opa godoł na bratki "siyrotki", a na przebiśniegi chyba "śnieguliczki". Ale ni ma żech pewny

Dodaj komentarz