A mōmy karnawał


Terozki to już ludziska niy wajerujōm jako downi, bo do roboty trza iś praje kożdy dziyń rano, ale jako spōminoł starzikōw brat, za jego modych lot, to sie dycki cołki karnawał wyprawiało roztōmańte breweryje a kōnsztiki. Roboty na polu niy było, a w dōma baby wszyjstek zrobiły, nō, to co mieli robić te wszyjski mode karlusy, co w nich krew aże wrała? Po nocach po wsi lotali a robili na bzdury! Jednymu fōrtka wyniyśli na kalynica , a drugimu wrota dziegsym abo gōwnym namazali . Nojgorsze było to, że ani psioki na nich niy szczekały, bo przeca tych gizdōw znały! Jak kery był szprytniyjszy, to se wrota a fōrtki ketami pospinoł, ale synczyska i na takigo znodli rada: jakżeś je taki mōndry, to my ci pōmogymy – padali se, a tak zrobili, bo wszystek powiōnzali sztacheldratym!

Jedyn roz jak szli we wieczōr ze kaczmy, musieli przynś kole chałpy ōd jednej starki, co po pytaniu chodziła. Synczyskōm sie ji troszka żol zrobiło i padali se, że ji pōmogōm, bo widzieli u jednego bogocza na placu kupa narōmbanego drzewa i chcieli tam nabrać a tu prziniyś! Ale kaj to wszystek skować, coby tym stary cham sie niy kapnōł? Jedyn karlus padoł, że nojlepi bydzie jak drzewo zaniesōm na gōra, kaj starka siano trzimała. Wiela by sie ani niy narobili, bo już drabina przirychtowano stoła, ale nojprzōd trza było plac na tyj gōrze wyrychtować! Jednako jak tam wleźli to zgupieli, bo tam było towaru a towaru! Jedyn synek wele dźwiyrzi dostoł bez pysk wyndzonym, świńskim kitym, co na szpugacie wisiało, dali było połno lōntōw a dekōw, a ze zadku zaś sznura, co na ni wisiały suche wuszty, a świyżo baranina! Ta starka wcale niy była tako biydno jako godała! Miała wszyskigo zatela i sama by tego niy dała rady zjeś, bezto trza i było ji pōmōc, a to wszystek, co na gōrze było, po biydokach rozniyś i tak tyż synczyska zrobili! Po drodze tyż sami troszka zeżarli ,a reszta biydokōm na klampki przi dźwiyrzach powiyszali! Potym we wsi ludzie godali, co sam musioł być świynty Mikołoj! Yno starka po cichu wajała, a pluła se we broda, że tako gupio była, a gōry dobrze niy zaparła i drabiny niy skowała, ale co było robić , kej już było za niyskoro? Jak chcesz być mōndrzyjszy ôd drugich, to musisz dycki myśleć do przodku, bo po szkodzie sōm mōndrzi wszyjcy bez wyjōntku!

GRYMLINO

Baner reklamowy

Komentarze

Dodaj komentarz