post image

A co majōm robić ci co piykne auto a „prawko” majōm? Tu idzie ô moich dobrych znajōmkōw, co majōm elegancki zagraniczne auto. Ôjcowie go wyporzōndzōm, że aż sie blyszczy, a jejich syneczek za kwila łapnie klucze a paradzi sie po mieście. Jak przijedzie nazod zaś je robota, bo auto trza umyć. Tak to tatulek z mamulkōm swoja ”bryka” sztyjc wyporzōndzajōm miast niōm jeździć!
Jednako wiynkszina ludzi, te auta potrzebuje, bo jeździ nimi do roboty, wozi dziecka do szkoły, a szkōłki, a potym po robocie do jakigo supermarketu jedzie, coby tam jakiś towor nakupić. My ze chopym kupujymy tam nojwiyncy tych przewarzideł, bo sōm łacniyjsze! We naszym ôsiedlowym sklepie tyż dobry towor je, yno troszka drogszy, ale za to nasz, a niy ze zagranice!
Nasze dziecka praje wszyjski majōm już swoji familije, bezto auto sie im przido, ale i tak niy dajōm rady wszyjstek ôbskoczyć!. Na drōgach tych autōw je coroz wiyncyj i kupa czasu sie bezto mitrynży, bo trza stować co kōnsek, skuli tego, że kajś na drōdze je karambol abo sie światła na krziżōwce popsuły! Pryndzy by sie na kole zajechało, ale na autobanie to sie niy śmi! Mōj chop bezto sie przeciep na koło, a jeździ nim po mieście. Yno jak jadymy kaj dalij, to musi te aucisko ze garaże wykludzać. Jo autym woża sie mało, ale tyż se padōm, że to je dobry wynalazek! Jak mōj chopeczek bōł we sanatorijōm, musiałach se radzić sama, bezto wziynach se taksōwka. Ale radach niy bōła. Panoczek taksōwkorz bōł cołkiym w porzōndku, yno ôgrōmnie niykapliwy. Niy prziszło mu do gowy, że chrōmo baba mo ciynżko ze tego auta wylyź i kwila to twało niż jo stanyła na ziymi.
Jako widzicie roztōmili, ze tymi autami to jej nōm źle: bo smrodzōm, kopcōm a miejsce zastawiajōm, ale bez nich jeszcze gorzi! Jednako chocioż tyn jedyn dziyń to by my sie mogli bez nich ôbyć, co godocie?!

Komentarze

Dodaj Komentarz