Kosy śpiywajom, cilipy już gniozda majom gotowe, ale skowronkow jeszcze jakoś niy słychać, chocioż 21 stycznia św. Agniyszka wypuściyła je z miyszka. Boczonie już tyż sie pokozały na swojich gniozdach, ale tyż niy wszyndzi, na pewno czekajom na cieplejszo wiosna abo tyż niy chcom tu przilecieć, bo sie dowiedziały, że niydługo pójdom na pynzyjo. Niy bydom miały chneda roboty u nos, bo coroz mynij majom zamowiyń na dziecka. Żabow tyż coroz mynij skuli tyj chymie, no i coroz wiyncyj autokow po drogach jeździ, że ni majom prawa przelyźć na drugo strona szosyje z łonki do stawu.Ubywo tyż tych bujnych i kwitnoncych łonk. Mało kto teraz zbiyro siano, a kośnikow już ruski rok żech niy widzioł. Kto tam teraz kozy, barany i kroliki chowie? A krowow to już na naszym Ślonsku ani niy widać sie paść i nikedy se myśla, że wszystki sie powściekały i z naszych wiosek pouciekały. Dużo by godki było na tyn tymat, ale tukej o boczoniach dzisioj berom. Swojom drogom tracom sie barzoły i łonki, bo zarostajom szczotami i inkszymi charpynciami abo tyż zasypujom śmieciami i bergom, a za chwila stawiajom na tym supermarkety, żeby my mieli kaj kupić świyże mlyko od krasule.Na te biydne boczonie sie rychtyk ludzie uwziyni i ciynżki los ich czeko. Co to piyrwyj uciechy było, jak nad chałupom na wiosna przelecioł boczoń. Bajtle wylatowały na dwor i wołały: „Boczoń! Boczoń! Prziniyś mi siostrzyczka abo braciszka!”.Dzisioj już żodyn tak niy woło. Jak już tyż kery sie sztelnie dziecko, to musi być to pewne, że bydzie to dziołcha abo synek i musi być podane do łojcow. Musi tyż mieć taki, a niy inkszy kolor włosow i oczow, co tyż dzisioj wszystko idzie zrobić. Bierom ziorka od jednego i drugigo, w jakiś krauzce to miyszajom i nic yno czekać na to, co sie obsztelowało. Gupie boczonie sie na tym niy znajom i prziniesom to, co popadnom. To tyż piyrwyj jedni mieli same dziołchy, zaś inksi samych synkow i coroz wiyncyj dzieci sie znojdło w rodzinie, bo czekali sztyjc abo na cera, abo na synka, a boczonie jak na ujma sztyjc sie myliły.Toż niy dziwota, że teraz zostanom bez roboty i muszom iść na przedwczesno pynzyjo.
Komentarze