Bioły ber bardzo chyntnie chcioł jechać z Mikołajym na odwiedziny do utopka Megusia, ale taki wielki ciynżor to ani sztyry rynifery by tych soń niy uciongło, a co dopiyro dwa, kerymi dycko Mikołoj przijyżdżo, tym bardzij że ze śniegiym jakoś licho było.
Wzion bez to yno małego pingwina Maciusia ze sobom. Wiela było uciechy, jak rano ujrzoł Meguś przed swojom chałupkom małego pingwina Maciusia, kery dreptoł po ciynkim jeszcze lodzie i kolyboł sie pociesznie na boki. Wroz z tym nowym kamratym Mikołoj prziwioz pora miechow śniega i wysypowoł go na ziymia z wysokij chmury, nad utopkowom chałupkom. Śniyg lecioł polekutku i przikrywoł biołom pierzinom wszystki sity i tatarczuchy na stawie. Meguś niy wiedzioł, co z tyj uciechy robić. Tu sie witoł serdecznie z Maciusiym, a tukej by trza było gibko tyn śniyg zgrzybać, żeby małymu pingwinkowi igloo zrobić. Maciuś tyż piszczoł z wielkij uciechy, bo tyż piyrszy roz w swojim życiu utopka widzioł, oba sie radowali z tego spotkanio. Naroz Maciuś godo do Megusia:
– Co to u wos za czorny śniyg leci?
– No dyć jo bych sie tyż musioł spytać, bo przeca mi Mikołoj pedzioł, że prziwiezie ze sobom pora miechow i rozsypie nad mojom chałupkom. Ni mom pojyncio, czamu te nikere gwiozdki śniegowe som durch czorne.
Oba sie patrzyli do gory i wtedy ujrzeli, że z tego nojwyższego kumina z elektrownie leci wielko chmura czornego kurzu.
– No ja! – padoł Meguś. – Juzaś te gizdy elektrofiltry wyłonczyli, co chwila tak robiom. W nocy wyłonczom, a jak sie rozwidni, to zaś załonczom. Teraz już wiysz, czamu tukej taki czorne gwiozdki śniegu z nieba lecom. Obiecuja ci, Maciusiu, że w Megolandii tego niy bydziesz widzioł, bo tam czas stoji w miejscu i takich rzeczy niy ujrzisz, kere tukej ludzie wymyślili.
Podziwoł sie Meguś z wielkim żolym do gory i zaczon chytać do rynki te czorne gwiozdki śniegowe i zamiynioł je swojimi czarami na złote gwiazdki, kere ciepoł pod nogi zdziwionymu pingwinowi. Gwiozdki świyciły na ziymi choby te prawdziwe na niebie i lekko grzoły nogi Maciusiowi, kery nigdy niy wiedzioł, co to znaczy taki przijymne ciepełko w nogach.
Komentarze