Łod czwortku się tyż już ze chałpy nic niy wydowało ani niy pożyczało, choćby niy wiym kto prosił, a wszystko bez te marchy, co krowom mlyko łodbiyrały. Na to se trza było dać pozor! Jak gospodorz wbił widły do ziymie na pojstrzodku placu, to sie niczego boć niy musioł! Wszyjscy tak robili, choć farorz przezywoł ze ambony na taki breweryje.
We Wielki Piontek rano była łostatnio Droga Krziżowo, a potym to już nic, yno adoracyjo przi Bożym Grobie. Dzwony były zawionzane bez cołki piontek i sobota a wszysko bezto, że Ponboczek leżoł we grobie. Nojwiyncyj z tego uciechy mieli ministranty. Drzewianymi klapaczkami robili wele kościoła taki larmo, że dzwony by wiynkszego niy zrobiły!
Wczas rano ludzie szli umyć sie do rzyki abo stawu, a to skuli tego, coby być szwarnym a zdrowym bez cołki rok. My tyż dycki lecieli z bracikiym na Głymboki Doł. Tego stawu już downo ni ma, ale myśla, że żorzany wiedzom ło czym pisza.
We Wielko Sobota farorz świyncił jodło. Niosło sie go do kościoła połne kosze abo wiozło furom. Świynconego musiało starczyć na cołki dwa dni świont. We bocznej kapliczce stoł dycki koszyk do ubogich, a ludzie tam dowali, co kery mogł ze jodła. We wieczor jak już było cima, świynciło sie woda a łogiyń. Zapolało sie długi palmowy sztyl łod świynconego łognia a farorz świyncił go. Na taki łopolony sztyl godajom głowionka. Z tego sie robiło po Wielkij Nocy krziżyki a wbijało po rogach pola, coby grad obiyli niy wybił.
We Niedziela Wielkanocno wszyjscy sie wybiyrali do kościoła na rezurekcyjo. Jeść sie niy śmiało już łod sobotnigo połednia, bo sie szło do komuniji, ale jak sie prziszło do dom, to dziepiyro sie jadło a jadło, bo łod czwortku sie pościło. Nojprzod na stoł trefiły jajca, potym szinki, wuszty a roztomańte babowki.
We śmiergust chopcy loli wodom dziołchy a we wtorek czasym dziołchy synkow, no a nejdeli we strzoda zaczynoł się normalny żywot, chocioż jeszcze bez cołki tydziyń chodziło sie rano do kościoła!
Komentarze