Jak yno na wiosna troszka sie rozciepli, moje somsiady wyciongajom ze pywnice koła. Sprawujom a pucujom je po zimie, coby sie kaj na nich wybrać na wycieczka. Mie je wtedy łogromnie żol, że jo śnimi jechać niy moga, ale zdrowie niy pozwolo! A jeszcze pora lot nazod to my jeździli cołkom familijom do Baranowic, do parku przi zomku, do jankowickij studzionki, na gora św. Wawrzińca we Orzeszu, na Ramżula, łobejrzeć stary kościołek we Bełku abo we Palowicach, czasym latowom porom kompać sie na Bies abo na Śmiyszek, nikiedy do lasa na jagody abo na grziby... Teroz to rada spominom!
Łońskigo roku poznałach Gabrysia – poetka ze Suszca, co wiela ło ludziach a ło przirodzie pisze. Łona tyż rada na kole jeździ, a roz sie do mie wybrała. Chciałach jom łodgodać, coby niy jechała, bo na podzim gibko robi sie cima, ale łona za godzina już u mie była. Troszka my yno posiedziały przi tyju, ale i tak brała sie nazod przi miesionczku. Łogromniech sie starała, bo na drodze na Pszczyna straszny ruch je w dziyń i w nocy. Jak taki tir przejyżdżo, to człowieka chce zdmuchnońć do rantu! Bezto jak mi zadzwoniła, że już je w doma, to mi kamiyń ze serca spod!
Godałach kiejś ze jednym chopym, co na kole przejechoł Czechy, Słowacja a Wyngry, a tyn rok sie wybiyro do Austryji. Pytałach sie go, jako tam sie dogodoł. A łon sie yno łośmioł, a padoł, że dycki sie pora słow nauczy, a reszta godo rynkami nogami, a poza tym: świat je maluśki i prawie wszyndy Polokow idzie spotkać!
Kiejś jo tyż wyjyżdżała ze chopym za granica a troszkach świata łobejrzała, ale łostatnich pora lot jeżdżymy yno po blisku, bo człowiek po świecie loto, a niy wiy, co je we drugij wsi! Jak kto mo czas, to polycom drzewiane kościołki wele Pszczyny a we okolicy Zebrzydowic, stawy wele Żorow a kole Raciborza, ku tymu Czerwięcice – nojpiykniejszo wieś, jako żech w życiu widziała i kaj sie narodziła mamulka łod mojigo starzika, no a jeszcze niyzapomniany widok na dolina rzeki Odry ze przikościelnego kerhowa we Sławikowie.
Myśla, że na ta wiosna wom tych moich wymysłow styknie! Je żech jednako ciekawo, eli wy tyż mocie taki miejsca, kaj radzi jeździcie, a krom wos mało ludzi ło nich wiy.
Była bych łogromnie rada, jakbyście mi ło tym napisali na internetowej stronie naszej gazety.
Komentarze