Nojlepi by było wcale sie niy uczyć kurzić, dycki to młodym godom, ale jak już kery kurzi, to by sie mioł, co nojrychlij łoduczyć, ale to ni ma tak łaps! Wiym coś ło tym, bezto żodnego niy byda namowiać na ciepniyńcie kurzynio ani straszyć rakiym pluc, bo to niy pomoże, jak sami sie niy zaweznymy, chcieć to je dziepiyro poła sukcesu, a na ta drugo poła muszymy się jeszcze fest naharować!
U nos we familiji było trocha kurzokow, choćby taki ujek Bolek, co kurził łod osmego roku życio, nojprzod po lekuśku, a potym i po paczce na dziyń. Trzimoł sie tyj normy chocioż mioł już bez siedymdziesiont lot, bo godoł, ze wyndzone miynso sie dłużyj trzimie! Na raka pluc niy umrził, ale dorobił sie polipow we nosie, co mu fest przeszkodzały we dychaniu.
Mój starzik Paul, co był fesztrym, we lesie nigdy niy kurził, ale za to w doma mioł tako drzewiano skrzinka skowano na kachloku, a w ni prawe cygara. Zaroz po wojnie kurził fajfka cołkiym jak jego łojciec, co tych fajfkow mioł aż piyńć. Jak pokozały sie we sklepach polskie cygara, to starzik był łogromnie rod, jak mu kery ich kupił na urodziny. Pora razy ciepnoł kurzyni, a potym za pora lot zaś zaczon łod nowa.
Kurził też mój szwiger, ale jak sie zapar a padoł, że łod jutra niy kurzi, to słowa dotrzimoł i za to żech go dycki podziwaiała!
Na jedyn czos kurził tyż moj chopeczek, ale łon tak raczyj pokurzowoł do towarzystwa, ale po jakimś czasie ciynżko mu było ze tymi cygaretami skończyć!
To samo robił nasz synek, ale jak mi roz podpadło, że mu kurtka cygaretami śmierdzi, to sie wyłgoł, że był ze kamratym na piwie, a tam wszyjscy kurzili, a jo, gupio, mu uwierziła! Nasze młodsze dziecka go kryły, bo im padoł, żeby mamulce nic niy godać, bo sie bydzie starać! A co jo bych mu mogła zrobić? Co nojwyżyj mu to rozgodać, a myśla se, że to było to, czego łon sie nojwiyncy boł!
Nikere moji kamratki tyż kurzom a dycki mi godajom, ze jo kupa piniyndzy uszporuja, prawie skuli tego, że niy kurza, ale co z tego, kiej jo se za te oszczyndności nic kupić niy poradza!
Ponoć ze tyn kurzynim je tak, jako ze jazdom na kole – tego sie niy zapomino! Starczy, że cie kery poczynstuje, a jak niy dosz se pozor, wsadzisz cygareta do gymby i cołko, choćby i długo abstynencyjo na nic!
Prosza Wos roztomili, pomyślcie choć troszka ło swojim zdrowiu, bo je ku tymu prziwilijo, za pora dni momy „dzień bez papierosa”!
Komentarze