Moj starzik potrzebowoł psa na liszki, co sie fest rozpanoszyły we Baranioku. Łod przociela ze Maciejkowic dostoł młodego dakla. Psiok był był łogromnie mały podle swojigo braterstwa a taki troszka niywydarzony, ale dzieckom sie fest widzioł. Tak sie suka Asta znodła we Baranowicach. Gibko urosła a łogromnie była wyzgerno, bezto i wszyjscy przoli, a starzik mioł noreście kamrata do lasa! Roz-dwa nauczyła sie wykurzać lisa ze nory, bo była maluśko a wszyndy wlazła.
Jedyn roz Asta poszła ze starzikiym na niwa, co i godali Kympa, bo na pojstrzodku miała tako sporo gorka a nałokoło bażoły. Dakle niy som nojposłuchliwsze, bezto jak Asta trefiła na dziura we ziymi, zaroz do nij wskoczyła a niy pomogło żodne wołani!
Suka darła do przodku, a co kwila poszczekiwała, isto trefiła na jakigoś zwierza. To sie mogło źle skończyć, bo nora, kaj wlazła niy była łod lisa, yno łod jaźwca. Jaźwiec je wiynkszy a szyrsze gonki kopie. Czasym lis do jaźwcowej nory wlezie, jak sie mu swojij kopać niy chce, bo ziymia je za twardo na jego maluśki szłapki. We przirodzie jednako tyż ni ma wszystek tak łaps: nojprzod trza właściciela ze dziury wykurzić! Jaźwiec mo rod czystość a porzondek, a lis chytrus nasro mu do pojstrzodka a cołko nora je już jego. Starzik mioł nadzieja, że Asta wylezie drugom stronom, bo te jeji szczekani coroz gorzij było słyszeć, chocioż łona była fest dociyrno, ale potym usłyszoł, jakby ktoś pora razy ciepnoł piosek sztychowom, a za moment coś skoczyło we krzoki na kympie. No to już starzik był w doma: jaźwiec Asta we dziurze zakopoł! Łopatka we rukzaku starzik mioł, ale niom wiela niy zrobił, bo dziura szła pod korzynie starego dymbu. Jedyne wyńście było takie, coby gibko polecieć po ludzi do pomocy, bo inaczyj pies mog sie udusić! Starzik powiesił swoja czopka na krzoku, kaj dakel wloz, bo we lesie jedyn krzok je do drugigo podany, a za ćwierć godziny był nazod ze trzyma chopami. Rozkopali prawie cołki bok gorki, dostali sie do jaźwcowej jamy, ale psa niy znodli. Już mieli iść ku chałpie, jak posłyszeli nojprzod dropani a potym uradowane szczekani, Asta wylazła sama!
Komentarze