Ze tymi mianami dycki było tak, że ludzie dowali ich dzieckom podle mody. Już widza, jak sie nikerzi ciepiom, a godajom: jo mom miano po starce, a niy po modzie!
Starki łod mojigo tatulka mianowały sie Neżka a Paulina, zaś mamulczynym starkom było Paulina a Marianna. Je widać, że we tamtych czasach Pauliny we modzie były!
Bez sto lot nazod dziołchom dowali: Domicela, Klementyna, Elfrida abo Kunegunda. Teroz to by nom sie te miana niy widziały, ale wtynczos po placu tyrało kupa Celi, Klimusiow, Fridkow a Gondeczkow, spomnijcie se yno na miana łod swojich starkow!
Łojce synkowi Konrad dali, a potym Konder go wołali. Bajtlowi łod kowola było Aleksander, ale kamraty wrzeszczeli za nim Alok, tak samo jak za Alojzym!
Czasami dziecka mieli jakiś wymyślate miana. Siostry łod mojij starki Elzy tyż padły łofiarom! Ciotka Valesca – Mercedes to była łogromnie bogato paniczka, a wszystkim znajomkom cisła sie za potka, bo godała, że i to szczyńści przinosi! Geszynki dowała na krzciny wielgi, to jeji wymysły ludzie leko trowili. Jednej dziołsze dała na miano Waleska, a chciała, żeby i dać jeszcze na drugi Mercedes po potce, ale farorz sie niy zgodził, a łokrzcił maluśko Waleska – Marianna. Za dwa lata wykombinowała taki miano ze francuskij ksionżki – Constantine, ale farorz już mioł dość tego wynokwianio a padoł, że łokrzci yno Konstancja abo Konstantyna, a potka, choć niy rada, musiała wybiyrać! Starczyno siostra dostała na miano Konstantyna, ale w doma i Kusztanta godali.
Jedyn moj ujek narodził się po piyrszej wojnie zaroz jak yno na Ślonsku Polsko nastała. Jego mamulka chciała mu dać Ginter, ale żorski farorz ani niy chcioł słyszeć ło takim mianie! Wywstoł na borokow potkow, a łoni niy wiedzieli, co zrobić, to farorz zadecydowoł za nich a padoł tak: – Niy bydzie mu ani Ginter, ani winter... Bydzie mu... Bydzie mu... (tu pojrzoł do jakiś ksionżki)... Bydzie mu Wicynt!
I tak synka łokrzcił.
Na tym sie starości niy skończyły, bo po drugij wojnie ujek zaś se musioł zmienić miano.
Komentarze